Shillong, Naitung 22: U Myntri rangbah ka jylla u Dr Mukul Sangma bad ka kynhun myntri jong u mynta ka sngi kim shym la poi sha ka jingialang kaba la khot da ka seng Hynniewtrep Youth Council (HYC) ia kaba kila khot sha kane ka jingialang kaba ki la buh ban long ha Khasi National Dorbar Hall, Mawkhar.
Haba kren ha ki nongthoh khubor, halor ka jingbym poi jong ka kynhun myntri sha kane ka jingkhot jong ka seng u Bah Peter Lawai president jong ka seng u la ong ba kane ka jingbym lah ban poi ka jong ki sha kane ka jingialang mynta ka sngi ka kren shai ia ka jingbym don ka jingkit khlieh ka jong ki ia ka jylla bad ia ka jingwan rung kyrthep jong ki briew ba nabar sha kane ka jylla.
La ong ba ka seng ka dep ban ai da ka shithi sha baroh 12 ngut ki myntri jong ka sorkar ha kaba ia dei bad kane ka jingialang kaba ki la khot mynta ka sngi, kam dei ban ki khlem ai shithi kila dep ban ai da ka shithi. Ka jingkhot jong ka seng ka long ba kin ia kren halor ka Inner Line Permit kaba ki dawa.
Kiwei ki mat kaba ki kwah ban ia kren ka long halor ka hok jong ki paidbah nongshong shnong jong ki trai jylla, ha ka sain pyrthei, ha ka khaii pateng, ka seng ka kwah ban ia kren halor ka Residential permit, ka Work Permit. Hynrei ka jingbym poi jong ka kynhun myntri na ka liang jong ka seng kam shym la lah ban ia kren lane ban ia phylliew jingmut bad ki myntri.
Namar ba ka kynhun myntri kaba la ialam da u Dr Mukul Sangma kam shym la poi sha kane ka jingialang, na ka liang jong ka seng kala shim ia ka rai ba kin beteng ia ka jingiakhih ka jong ki da kaba jai jai, ha ka kin pynlong ia ka jingdeng lama iong ha ka 26/7/2017, ha ka 27/7/2017 kin pynlong ia ka jinglum ki dkhot ka seng ha Additional Secretariat bad ha ka 29/7/2019 ka seng kala khot ia baroh ki MLA kiba don ha ka liang synshar ha ka jingialang ban ia kren halor kitei ki juh ki mat.
