Shillong, Iaiong 15: Halor ka jingkyrpad jong kiba ha iing jong u Dr Sailo na ka shnong ban shah ban tep ha kper kaba don ha Nongpoh, na ka liang jong ka Executive Committee jong ka dorbar kala ia shong kyrkieh ban ia kren halor kane ka kam bad ha dien ka jingiakren la shim ia ka rai ban nym shah ban tep hapoh ka shnong.
Ki daw kiba ka shnong kam shym la ai jingbit ka long ba ki nongshnong shnong ia mynta ki dang syier mynsiem bad kim sngew tynnad halor kane, namar ka pham house ka don ha pdeng jong ka shnong bad bun ki tnum iing kiba ia khap.
Ha ka juh ka por na ka liang jong ka dorbar shnong kala kdew ba um dei u nongshong shnong ba pura jong ka Nongpoh Proper bad kumba ka long haduh mynta kam pat don ka jingiada kaba pura halor kane.
U bah M Mynsong rangbah shnong Nongpoh Proper haba kren ha u SP News Agency u la iathuh ba kate ka rai ka dei kaba kila shim ha ka jingialang kaba kyrkieh mynta ka sngi ha dien ba kila ioh ia ka jingkyrpad na u khun jong u Dr Sailo hynrei namar ba ki paidbah kin pdiang kum ka shnong ki hap ban shim ia katei ka rai.
La iathuh ba ha ka jingiakren bad u Bah David khun jong u Dr Sailo bam kwai ha dwar u blei u la pynpaw ia ka jingsngewsih halor kane ka jingjia namar ba u Dr Sailo u la leh bun ki kam ha kaba ia dei bad ka shnong hynrei haba ka jia kumne kin nym lah ban leh ei ei bad na ka liang jong kiba ha iing ruh ki pdiang ia ka jingpynsngew jong ka shnong.
Na ka liang jong ka shnong kala phah ia kane ka rai sha u MLA jong ki u bah Mayralborn Syiem bad kum juh sha u MDC u Bah Balajied Ranee ban pyntip sha ki halor kane ka rai jong ka dorbar shnong.
