Shillong, Naiwieng 01: Mynta ka sngi ka kynhun ki seng bahlang kaba kynthup ia ka HYC, HANM, EJNU, JNM bad ka CORP kila tur sha Secretariat ban dawa na ka sorkar bad ka dei ban pyntrei kamnoh ia ka Inner Line Permit hynrei da poi ha IGP kila sha khang lynti bad pynphai sha Mawbyna.
U mytnri kam poh iing ka jylla u bah Lahkmen Rymbui u la khot ia ki nongialam jong ki san seng ban ia kren, ha kane ka jingiakren na ka liang u myntrei kam poh iing um shym la ai kano kano ka kular bad la shu ong ba un rah ia kane ka jingdawa sha ka sorkar. Ki san seng ki khlem sngap ia ka jingpynjari ia ka 144 Cr.PC hynrei kila ia tur sha Secretariat.
Ha dien kane ka jingiakren la pynkynriah sha Mawbyna ha kaba ki dkhot jong kitei ki seng kila ia pynlong ia ka jingpynrta da ki dawa ba sorkar pdeng bad ka sorkar jylla kin pynurlong noh ban pyntreikam ia ka ILP, ban pynrung ia ka ktien Khasi bad Garo ha ka khyrngit kaba phrang jong ka riti synshar ka Ri India bad kiwei kiwei ki jingdawa.
Haba kren ha katei ka jingialang u General Secretary ka seng HYC bah Roy Kupar Synrem u la ong ba kane ka jingiakhih kan dang iaid bteng haduh ban da pynbna ia ka elekshon ha ka jylla bad ha dien kata kin sa shim ia kiwei pat ki rai ban pynthikna ba ka sorkar pdeng bad ka sorkar jylla ka dei ban pyntrei kam ia ka ILP ha kane ka jylla.
Ha ka jingkren u President ka HANM u bah Lamphrang Kharbani la ong ba ka sorkar pdeng bad ka sorkar jylla ka dei ban pyntrei kam ia ka ILP ban iada ia ki rit paid kane ka jylla, lada ia ka ILP la pyntreikam ha Arunachal Pradesh, Nagaland , Manipur, Mizoram balei ym lah ban pyntreikam ha Meghalaya.
La ong ba lada ki kam lehnoh ki kharai ha kane ka jylla ka sorkar pdeng bad ka sorkar jylla kim hap ban shim ia ka jingkitkhlieh, kum ki seng bhalang kim kwah ban kane jia hynrei lada ka sorkar pdeng bad ka sorkar jylla kim shim khia la ong ba wat ialehkai bad ki samla.
Ha kane ka sngi ki nongialam ki san seng kila wan na kylleng kylleng ka ki lum khasi, hynrei bun na ki dkhot kila shah khanglynti noh ha shiteng lynti shuwa ban poi shakane ka jingiaid paidbah, ha kane ka sngi da ki spah ngut ki ki smala kila ia poi sha kane ka jingiakhih.
