Shillong, Naiwieng 18: Mynta ka sngi u State President ka party BJP, u bah Ernest Mawrie u la plie ia ka ophis trei kam jong party hapoh ka 17-Shillong North Konstitwensi ha Jail Road, kane ka dei ka ophis kaba ar jong ka party ban pynkhreh ia ka elekshon MLA jong u snem 2023.
U Bah Mariahom Kharkrang u wei na ki ba pan tiket na ka party BJP ban ia khun ia ka elekshon MLA ha u snem 2023, la ong ba khmih lynti ba ka party kan pynbna ia ka kyrteng jong ki kyrtong ha ka por kaba biang bad ia kane wat u State President ruh u la pynsngew.
U bah Kharkrang la ong ba ka 17-North Shillong Konstitwensi ki don saw tylli ki jingeh ha ka jingioh jong u, ka pule puthi, ka koit ka khiah, ka jingshong shngian, ka ioh kam ioh jam, la ong ba naduh ba pynia soh sha ka party BJP u la sdang ban pynkhreh bad kren ia kitei ki jingeh.
U bah Kharkrang la pynkynmaw ba ha ka por ba u dang long Superintendent ki Pulit jong ka East Khasi Hills District la pynmih ia ka jingtrei kam kaba la tip “Safe Secure Shillong” lyngba kane la buh ia ki CCTV ha ki jaka ba don kam hynrei mynta kine kim da trei kam shuh.
La ong ba ka long kaba don kam ban don ia ki CCTV namar lada don kano kano ka jingwit hapoh kane ka jylla Meghalaya khamtam hapoh ka nongbah jong ka jylla kaba shah ktah eh dei ka 17-Shillong North Konstitwensi namar hapoh kane ka konstitwensi ki don ki iew kiba heh tam ha ka jylla.
La ong ba shuwa ba un shongthiat khlem pat dei por, bun ki party kila wan khot ia u, kum ka party Congress, hynrei shuwa ba shim ia ka rai u la da bishar bniah, ha dien bala bishar bniah la ioh ba ha ki jylla kiba ka BJP ka synshar ha kane ka Ri India ki jylla ki iew ha baroh ki kam pynroi.
Dei halor kane u la shim ia ka rai ban pyniasoh bad ka party BJP bad ban pyntiket namar lada ka BJP kan wan ha ka bor ka jylla Meghalaya ruh kan sa kiew kum ba long lem kiwei ki jylla, la pynsngew ba lada ioh tiket mano manor uh ka dei ban don ka jingiatreilang.
