Shillong, Rymphang 16: Ka Dorbar Ki Khlieh Nongsynshar ka dap da ka jingsngewkhia ba haduh kine ki sngi kiba bun ki kam kiba ki nongmihkhmat District Council kiba rim bad kiba mynta la palat 67 snem (1952 haduh 2019 ) kim shym la lah ban pyndep ia la ka kamram bad ki sah teng kiba bun ki kam iada riti dustur hapoh KHADC.
Katto katne ki Kam kiba donkam ia ki MDC thymmai ba kin shim khia ki long ;
1. Ban tyrwa ka Committee ki pleader bad MDC kiba tbit hapoh JHADC bad KHADC ban pynkylla Khasi hapoh hynriew bnai ia ka Sixth Schedule (arphewei tylli ki paragraph), Constititution Ri India, bad baroh ki Act ki Rule ba la pynjari ka JHADC , KHADC, Sorkar Meghalaya bad Sorkar India naduh u snem 1950/1952 /1972 ter ter haduh kine ki sngi.
2. Ban ialeh ban pynbeit thymmai (amend) ia ka Sixth schedule khamtam ka Para 2 ,3, 9,12,15,16,20,21 bad kiwei kiwei ba kin long kiba don bniat katkum ka nongrim ki dulir Instrument of Accession and Annexed Agreement 17 August 1948, ym kumba long mynta ba ka Sixth Schedule ka la long ka top um kaba PEI.
3. Ban ia wer ia baroh ki MDC bad MLA Khasi Jaintia ban leit shah thngan hakhmat ka Dorbar Parliament haduh ban da ithuh ia ka ktien KHASI hapoh ka khyrnit kaba phra jong ka Constitution Ri India.
4 . Ban pynsted ia ka jingpynlong Ain (Act & Rule) ia la ki jong ki Riti Dustur Hima/Elaka ha la ki jong ki Hima/ Elaka – 19 Elaka ha JHADC bad 53-54 hapoh KHADC hapoh arsnem kumba la pynlong Ain suki suki ka KHADC ia ki arphew na ki 54 Hima/ Elaka ka Ri Khasi hadien 67 snem
5. Ban pynsted ka jingpynlong Ain bad ban pynpaw dur “kyntien” Dorbar shnong , Dorbar raid, Dorbar hima hapoh 6th schedule bad Constititution Ri India katkum ki kyndon IOA & AA.
6. Ban tyrwa ka committee ki pleader bad MDC kiba tbit kiban pynbeit thymmai ia ki Riti Dustur kiba la paw thohmut thohmat lyngba ki Act ki Rule jong ki Hima/Elaka kiba la thaw da ka UK& JHADC (KHADC bad JHADC) naduh ki snem 1952 haduh kine ki sngi khnang ba kin don bniat (nuksa Ka The United Khasi & Jaintia Hills District ( Trading by Non-Tribal) Regulation 1954 kynthup ka Rules 1959.
7 . Ban pyndep ia ki Kam ka boundary commission ba la dep thung naduh ki snem 1998 hapoh JHADC ka ban pynbeit ia u pud u sam Jong ki 18 Elaka baroh hapoh shi snem.
8 . Ban kyntu ia ka sorkar jylla ban Sorkar India ban pynbeit ia u pud bad ka Assam bad Bangla halor ka nongrim u pud ki Hima/Elaka bad halor ka nongrim ka First schedule Constititution of India bad ka nongrim Instrument of Accession bad Annexed Agreement 17 August 1948.
9. Ban pynkylla Khasi ia ka Ain Thaw iing (kaba 144 sla) kaba la phah da ka KHADC sha ka Sorkar Jylla.
10. Ban buddien ia ka jingeh kiba mih na ki palat 20 tylli ki Ain ka Ri India kiba tyngkhuh bad ka riti Dustur Kum ha ka jinglong trai ka khyndew ka shyiap bad kiwei kiwei.
11. Ban dawa pynbeit thymmai ia ka The Constititution (schedule Tribes) Order 1950 kaba list bakla haduh palat 40 tylli ki ST tribe hapoh jylla Meghalaya katba ha jylla Nagaland la list tang saw tylli ki jaid ST.
12. Ban dawa pynbeit thymmai ia ka The Indian Registration Act 1908, The Coal Mines Nationalisation Act 1973, The Forest Conservation Act 1980, The National Highway Act 1956 bad kiwei kiwei ki ba bun ki Act, Rule, Regulation.
13.. Ban kyntu jur ia ka Revenue dept, JHADC bad KHADC ban pyndonkam da ka bor jingstad ka juk mynta (Digital maping technology) ha ka ban pynmih ia ka dur MAP jong baroh ki HIma /Elaka ha kaba kan mih ka DIGITAL MAP jong ka JHADC bad KHADC da kaba pyndonkam da ki GPS bad khamtam ia ka Revenue Dept JHADC ba kin ai pata da ki kor jingstad ka juk mynta kum shibynta ban pynlait pynsuk ia ki paidbah bad ba kin lait na ka jing ia pyniap ne jing iaknieh jaka.
14. Ban pynbeit thymmai(amend) ia ka united Khasi Jaintia hills Autonomous district (Administration of Justice) rules, 1953 ban ioh punkup bor magistrate ia ki nonhpyniaid shnong, bad kyrdan Judge ia ki Khileh Hima/Elaka.
15. Ban pynlong ka jingiakren bad ka Sorkar Jylla bad Sorkar India ban pynphai ia baroh ki Bill ba la mynjur da ka District Council hapoh 30 sngi lada don kano kano ka jingwit ba kdew u Lat ka jylla.
Ka Dorbar Ki Khlieh Nongsynshar ka ai khublei kitbok ia baroh ki nongialeh MDC bad ka da khmih lynti ia ki ba kin shim khia ban pynlait por khnang ban pule ia ki dulir IOA & AA (kiba tang saw sla) bad ba kin long kiba im sngi ban buddien bad ban pyndep ia kitei ki mat kiba kiwei kim shym lah ban pyndep 67 snem mynta na ki daw kiba bun.
