Shillong, Naitung 10: ka Chairperson jong ka Meghalaya State Women Commission, ka kong Theilin Phanbuh, kala ong ba ka Commission kala khot hajir ia u Secretary jong ka Delhi Golf Club ba un hap ban wan hajir ha khmat jong ka Commission ha ka 14 tarik mynta u bnai, halor ka jingujor jong ka kong Tailin Lyngdoh kaba la shah niew bein ha kompaw jong katei ka club.
Ka Chairperson jong ka MSWC, mynta ka sngi kala khot ia ka kong Tailin Lyngdoh kum ka nongujor bad ia ka Dr Nivedita Barthakur ka trai nongai kam hapoh jong ka Commission ban shim ia ka jingbatai na kine ki ar ngut khamtam na ka kong Tailin kaba la shah niew bein hapoh jong katei ka Delhi Golf Club, na ka liang jong ka Commission kan sa lah ban shim ia kano kano ka rai ha dien ba u Secretary jong ka Delhi Golf Club u la wan ban mih hakhmat jong ka Commission.
Ha ka juh ka por ka kong Phanbuh kala ong ba na ka liang jong ka MSWC ka pynpaw ia ka jingsngewnguh ia ka ‘National Commission for Schedule Tribe’ bad kum kum ia ka ‘National Commission for Women’ jong ka sorkar pdeng kaba la shim ia kane ka kam ban leh ei ei ha kaba ia dei bad ka Delhi Golf Club halor katei ka jingniew bein ia ka kong Tailin na ka daw ba ka sem katkum ka riti synshar jong ka Ri, katkum ki ain ba ka Ri ka don.
Ha kane ka sngi na ka liang jong ka kong Tailin Lyngdoh, kala ong ba dei ban pynshitom ia kum kine ki jingleh namar ba kum kane ka jingjia kan nym jia shuh ha dien ha bud “ nga la leit kylleng, kum ha London, Abu Davi ngam juh shah kren bein, hynrei dei ha ri la jong nga shah niew bein hala ki jong ki para Ri”.
Na ka liang jong ka Dr Vivedita Borthakur, kala ong ba kumba ka long mynta ki don hapoh ka jingshah pynbor ba ki dei ban weng noh ia kane ka jingujor hynrei na ka liang jong ka kan nym kynrandien ha kaba ia dei bad kane ka jingjia namar ka kwah ba kum kane ka jingjia kam dei ban jia shuh nangneng sha khmat, ka long ba ia ki rukom pyniaid ia ka Delhi Golf Club dei ban pynkylla kame ka mynsiem mraw ka dei ban weng noh.
