Shillong, Jymmang 14: Ka jingialang jong ki nonghikai SSA hapoh Rambrai West Khasi Hills District kan long ha ka 19 tarik mynta u bnai hapoh Dorbar Hall Khlieh Iew Rambrai ha ka por 11 baje mynstep.
Ha u kyrwoh bala phah da i babu Phrangbor Marngar President ka Meghalaya SSA School Association (MSSASA) Rambrai Unit u la pyntip ba ha katei ka jingialang yn iakren halor ka rai jong ka Sorkar Pdeng ban siew tulop Rs. 15000/- shi bnai ia ki nonghikai Lower Primary bad Rs. 20,000/- shi bnai ia ki nonghikai Upper Primary kiba la thung kam hapoh ka Sarva Shiksha Abhiyan (SSA).
Katkum ka jingbei pisa ha pdeng ka sorkar pdeng bad ka sorkar jylla ha ka Ri India lyngba ka Scheme ba thymmai jong ka MHRD, Govt of India ka Samagra Shiksha Abhiyan (SMSA) ka ban trei kam naduh mynta u snem.
Kumjuh ruh yn ai ia ka kaiphot jong ka jingiakynduh jong ka Synjuk bad u Mynrtri Rangbah ka Jylla halor ka arrear ba dang sah jong u snem 2016 – 17 kaba naduh u bnai Naitung 2016 haduh u bnai Rymphang 2017 nalor kiwei kiwei ki kam kiba iadei bad ka iap ka im jong ki nonghikai SSA.
U bah Aristotle C Rymbai President Sengkmie bad ki nongialam ka West Khasi Hills District Unit kin iadonlang ha katei ka sngi. Ka Synjuk ka khot ka wer ia baroh ki nonghikai SSA hapoh Rambrai ban wan khnang khnang ha katei ka sngi.
