Shillong, Jylliew 02: U Myntri Rangbah ka jylla u Conrad K Sangma ha ka jingïadon ryngkat u myntri kam poh iing u James K Sangma, ki myntri kabinet u Bah AL Hek, u Bah Metbah Kyngdoh, u Bah Banteidor Lyngdoh bad u MLA jong ka North Shillong u Bah Adelbert Nongrum ha ka jingïadon lang ki rangbah shnong ka Mawkhar, Jaiaw, Wahingdoh, Umsohsun, Riatsamthiah, Jaiaw Pdeng, Mission Compound.
Ha kane ka jingialang la don lang ki riew rangbah ki seng long kmie bad ki seng samla, kane ka jingiakynduh la pynlong ka Meghalaya Secretariat ban ia kren bad ia mir jingmut kumno ban wan rah ia ka shong suk shongsaiñ ha ka thain Motphran bad ki dong ba marjan kiba hap hapoh jong ka 17 – North Shillong Constituency.
Ka jingialang ka long kaba seisoh namar na ka liang jong ka sorkar bad kitei ki kynhun kila ia pynsngew ia ka juh ka jingsngewkhia ha kaba ia dei bad kane ka jinglong jingman ka shong suk shong saiñ hapoh jong ka nongbah Shillong.
Ha kane ka jingialang na ka liang jong ki rangbah shnong kila kren bniah ia ka jingeh kaba ki nongshnong shnong ha ki bynta ban shah ktah ha kane ka jingïakhih bad kila kyntu ba ka sorkar ka dei ban weng noh mar dor ia ki pulit ban rung sha ki shnong ki thaw bad ban siat ia ki kuli pynsat khmat ha phyllaw jong ki iing briew.
U myntri kam poh iing u la ong ba na ka liang jong ki pulit haduh mynta ki pulit la tyngkan ia ka rukom pyndon kam bad ki pulit kin dang beteng ia kane ka jingtynga ka. Ha kane ka ka jingialang u myntri kam poh iing ba kumba la dawa da ki nongiakhih, ki pulit kila kem ia u wei u briew u ba don kti ha jingiashoh ha ka sngi Thohdieng bad mynta u dang don ha kti jong ki pulit ban tohkit shuh shuh.
Ha kane ka jingialang la ia kren bun ki bynta bad kila don ki rangbah shnong kiba la kren ha ha kaba ia dei bad ka jingpynjari ia kane ka Curfew, ha kaba ki la ong ba kam shym la don ka jingpynbna kaba biang ban ai jingtip sha ki paidbah.
Kane ka kynhun ha ka jingiakren bad u myntri rangbah ha ka jingïadon lang ki myntri kabinet kila dawa ba dei ban weng noh ia kiba shong ha Them Motor ia kaba la tip kum ka Sweeper Colony. Haba ia dei bad kane ka jingdawa na ka liang jong u myntri rangbah u la iathuh ba u la pan ia ka kaiphot na ka tnad kam pynroi sor bad ka na tnad ba dei peit ia ka khyndew ka shyiap ba kin ai jingshai ha kaba ia dei bad ka jingpynkhriah haka sah ia ki. U myntri rangbah u la ai ka jingkular ba ynda u la dep ban peit bniah ia ki kot ki sla ka sorkar kan san leh ia kaba don kam.
Na ka liang jong ki rngbah shnong kiba dei na kitei ki shnong kila ai ka jingkular ia ka sorkar ba kin ai ka jingïatreilang ban wanrah biang ia ka shong suk shong saiñ ha kane ka thain. kane ka kynhun la kular ruh ba kin pyntip sha ki nongiakhih ia ka jingseisoh jong kane ka jingiakren ban ong ba kim don kam ban ia khih namar bun ia ki jingdawa na ka liang jong kiba ia khih la kular ban leh da ka sorkar.
U Myntri rangbah ka jylla u la ai khublei ia ka kynhun kaba la wan ban ia kren bad ka sorkar bad khamtam eh ia u MLA jong kane ka jaka u Bah Adelbert Nongrum u ba la shim ia kane ka jinglam lynti na ka bynta ban wanrah ia ka jingshong suk ha kane ka nongbah Shillong bad u la ai ka jingkular ba ka sorkar kan trei na ka bynta ka jong u paidbah bad u la kyrpad ia kane ka kynhun ba kin ai ka jingiatrei lang bad ka sorkar na ka bynta ka jingmyntoi jong ka jylla.
