Shillong, Naitung 03: Mynta ka sngi ka Public Account Committee jong ka iing dorbar thawain ka jylla kala khot ia ki ophisar jong ka tnad rep ban kylli na ki ia kaei kaba la paw ha ka kaiphot jong ka Controller Auditor General ba ka tnad rep kala thep ia ka pisa ki nongrep T.9 klur ha bank.
Haba kren ha ki lat pathai khubor u lamphang ka PAC u Bah Charles Pyngrope u la iathuh ba ka jingkhot ia ki ophisar ka tnad rep mynta ka sngi ka long ba katkum ka kaiphot jong u CAG ka tnad rep kala thep ia ka pisa ha ki ar tylli ki bank haduh T.9 klur tyngka khlem pat pyndon kam kaba dei na u snem 2007-2014.
U Bah HM Shangpliang u dkhot jong ka PAC la batai ba ha u snem 2007 ka sorkar pdeng kala mang pisa T. 38 klur ia ka tnad Agriculture bad Horticulture, na kane ka sorkar pdeng kala pynlait T.19 klur sha ka sorkar jylla, hynrei ka ei kaba ka sorkar jylla kala pyndon kam ka long tang T.7.36 klur bad ia kaba sah ka tnad ka rep ka riang kala pynphai noh sha ka sorkar bad la thep ia kane ka pisa ha ar tylli ki Bank.
Kane ka pisa kaba sah mynta T.9 klur kaba khlem pat pyndon kam ka long ban ai jingiarap ia ki nongrep ban thied Power tiller, ban ai jinghikai ia ki nongrep bad ban iada na ka jingbam khniang ia ki jingthung.
U bah Gearge B Lyngdoh u wei na ki dkhot ka PAC, u la ong ba ka jingeh jong ki nongrep ka long ba kim ioh ia ki symbai haka por thung bad haba kin ioh ha ka por kaba biang kaktah ia ka rep ka riang bad ki nongrep ki ia kynduh shisha ia ka jingeh lada kim ioh ia ki symbai ha ka por ba biang. U bah Renikton L Tongkhar ruh u la ia don lang kum u dkhot ka PAC.
