Shillong, Lber 09: U Principal jong ka skul Jawahar Navodaya Vidyalaya, Niangbari, Ri Bhoi District, u la pyntip paidbah ba kino kino kiba kwah ban phah skul ia ki khun hapoh jong katei ka skul ki lah ban pyndap ia ka online application na ka bynta ka Klass IX na ka bynta jong u snem 2018-2019 bad ka sngi kaba khatduh kan long ha ka 5-4-2018 da kaba leit sha ka website www.nvshq.org.
Ki khynnah kiba apply na ka bynta kane ka jingpule ki dei ban long kiba la pass ia ka klass VIII ha u snem 2017-2018 na kino kino ki skul kiba la ithuh da ka sorkar. Ki dei ban long kiba la kha hapoh ka 1-5-2002 bad 30-4-2006 kane ka long tang na ka bynta ki ST/SC. Ka skul ka don ia ka hok ban phah peit ia ka koit ka khiah jong ki khynnah sha ki doctor. Ki khynnah ki hap ban ialeh ia ka eksamin kaba dei katkum kaba la pynbeit ha baroh kawei jong ka Ri India, ha ka ktien Hindi lane ha ka ktien phareng bad ka eksamin kan long ha ka 19-5-2018.
