Shillong, Lber 21: Mynta ka sngi u Lat jong ka jylla u la pynmih ia ka jingpynbna ba u la khot ia ka dorbar ba kyrpang jong ka KHADC ha ka 24th Lber 2020 kata la sngi ba ba Ar na ka bynta ka jingiatynjuh bor.
Ha ka jingpynbna la kdew ruh ia ka por ba ka jingiatynjuhbor kan long ha ka por 10.00 baje mynstep hapoh jong ka District Council Hall. Ia kane ka dorbar ba kyrpang la khot katkum ka rule kaba 22(1) jong ka AD Rule.
Kane ka jingiatynjuh bor kan long pyrshah ia ka Executive Committee. La bthah ia u lamphang ka iing dorbar ba un pynlong ka dorbar da kaba ring video camera bad ia ka kaiphot dei ban phah sha u Lat ka jylla lyngba ka tnad District Council Affair department.
Ha kane ka jingpynbna kaba la pynmih mynta ka sngi ka long da kaba iaid lait noh ia kaei kaba la pynmih ia ka jingpynbna kaba la long ha ka 13/03/2020, na ka liang jong u Lat lyngba kane ka jingpynbna kaba la pynmih mynta ka sngi u khot ia ka dorbar ba kyrpang jong ka KHADC katkum ka rule 36(5) jong ka Assam bad Meghalaya Autonomous Districts( Constitution of the District Councils) Rule 1951.
Ha ka juh ka por ha kawei pat ka jingpynbna kaba la pynmih mynta ka sngi ba ia ka jingpynbna kaba kaba la pynmih ha ka 07/02/2020 ha kaba u Lat jong ka jylla u la pynjari ia ka Administrator hapoh jong ka KHADC la weng noh, kum juh ia ka jignpynbna kaba la pynmih ha ka 13/03/2020 mynta u bnai ruh la weng.
