Shillong, Naiwieng 20: ka Executive Committee hapoh jong ka Khasi Hills Autonomous District Council jong u bah Teinwell Dkhar mynta ka sngi kala khyllem noh lyngba ka vote jong u Chairman u bah Pynshngianglang Syiem.
Ha dien ka jingiatai halor ka mat bym don jingshahniah shuh ia ka Executive Committee na ka liang jong u Bah Lamphrang Blah nongialam ka liang pyrshah haba la pan ia ka jingmut jong u hato un weng noh ne em ia ka mat bym don jingshaniah shuh, na ka liang jong u Bah Lamphrang u la ong ba um lah ban rai bad u la aiti sha u Chairman ban shim ia ka rai.
Haba u nongwanrah ia ka mat jingiakren bym don jingshaniah shuh ia ka EC u la aiti sha u Chairman ban shim ia ka rai, na ka liang jong u Chairman u bah Pynshngainlang u la buh ha khmat jong ka iing ban shim ia ka rai da kaba shuiathep vote ban tip la ka EC ka dang ioh ne em ia ka jingbum paid.
Ha kane ka jingiathep vote ha ka iing dorbar kaba 29 ngut ki MDC, ka liang synshar kala ioh 14 vote bad ka liang pyrshah kala ioh 14 vote. Haba poi ha kane ka khep kaba mar ia ryngkat na ka liang jong u Chairman u la pynbna hapoh ka iing dorbar ba u hap ban shim ia ka rai ban thep ia ka vote jong u ban shim ia ka rai.
Ha kane ka khep na ka liang jong u Chairman jong ka KHADC u la thep ia ka vote jong u bad haba la niew ia ka vote jong u ka leit sha ka liang pyrshah bad kane kala pynlong ba ka liang pyrshah kala ioh 15 vote bad ka liang synshar kala ioh 14 vote, da kane ka shi vote jong u Chairman ka EC jong u bah Teinwell Dkhar kala khyllem, la pynbna u Chairma hapoh ka iing dorbar.
