Shillong, Iaiong 04: Mynta ka sngi ka “Eriong Fani” kala poi sha kane ka jylla Meghalaya bad ha kane ka jingkhih kane ka eriong kala wanrah ruh ia ka jinghap jong u slap u bajur ha habroh kawei ka jylla ha ryngkat ka jingbeh ka eriong ha kaba bun bah ki dieng kila khyllem bad kumjuh ka jingtwa khyndew.
Kane ka jingwan kane ka “ Eriong Fani” kala ktah ia baroh kawei ka jylla Meghalaya bad kaba kham shah ktah eh ka dei ka South West Khasi Hills District, West Khasi Hills District bad kum juh kane ka nongbah Shillong ha kaba bun bah ki dieng kila khyllem.
Ka kong Ibashisha Mawlong, Joint Secretary, Revenue & Disaster Management Department, haba kren ha u SP News Agency kala iathuh ba haduh mynta kim pat lah ban ioh lut ia ki kaiphot na baroh ki District ha kaba ia dei bad kane ka jingshah lynsop ha kane ka eriong Fani.
Ka kong Mawlong kala iathuh ba haduh mynta ka kaiphot kaba ki la lah ban ioh ka long tang na ki ar tylli ki District, ka South West Khasi Hills District bad jong ka West Khasi Hills District, na kiwei ki District kila sdang ban wan bad ia ka jingjulor mynta ka ophis ka dang ap ban ioh ia ka kaiphot na baroh ki District ha ka jylla.
