Shillong, Jymmang 17: Baroh 12 ngut kiba la test Positive da ki Rapid Diagnostic test Kits ha ki khyndop shuwa ba kin rung hapoh ka jylla ha dien bala wan phai na Chennai, haba la test ia ki da ka RT-PCR baroh 12 ngut ki long Negative.
Na kine ki 12 ngut saw ngut ki dei sha Garo Hills ha kaba ia RT-PCR test la leh ha Tura ha kaba la shem ba ki long Negative, phra ngut kiba sha Khasi Hills, la test ia ki ha NEIGRIHMS bad ia ka reslot la ioh mynta ka sngi bad baroh ki long Negative.
U Myntri ka koit ka khiah u Bah AL Hek haba kren ha ki lat pathai khubor mynta ka sngi u la iathuh ba baroh kito kiba la wan phai na ka jylla Tamilnadu ka nongbah Chennai ki long Negative baroh.
La iathuh ba kaba shitom COVID-19 kaba khatduh eh la leh ia ka test kaba nyngkong mynta ka sngi bad ka reslot kala long Negative bad la shai ka sngi yn phah test biang katkum ka kyndon bad lada ka long Negative ka jylla Meghalaya kala lait na ka jingpang COVID-19.
Haba ia dei bad kito kiba la wan phai na Gujarat u myntri ka koit ka khiah u la iathuh ba baroh ki long 231 ngut bad ka jingtest ia ki ka dang iaid haduh mynta ha ki jaka kiba la buh ha man la ki District, kiba wan phai kiba bun eh da ka Khasi Hills.
