Shillong, Nailur 05: Mynta ka sngi kala don ka jingiakynduh hapdeng u myntri rangbah ka jylla u Conrad K Sangma bad ki nongialam jong ki 13 tylli ki seng bhalang ban ia kren halor ka Meghalaya Resident Safety and Security Act.
Haba kren ha ki lad pathai khubor ha dien ka jingiakynduh bad u myntri rangbah ka jylla na ka liang jong u President jong ka KSU u samla Lambokstarwell Marngar, u la ong ba ka jingwan ia kynduh jong ki mynta ka long halor ka jingthmu jong ka sorkar ban wanrah ia ka jingpynkylla ia ka MRSS Act.
La ong ba na ka liang jong ki 13 tylli ki seng bhalang kila dep ban ai da ka jingthoh sha ka sorkar jylla ba ka dei ban ia kren hapoh ka sorkar ha kaba ia dei bad ka MRSS Act, hynrei kumba kalong haduh mynta kim shym la iohi ia kata ka jingiakren hapoh ka sorkar.
La ong ba ki 13 seng ki paidiang ia ka MRSS Act, kane ka long tang kum kawei na ki lad jingiada, ki 13 seng kim pat kynrandin na ka jingdawa ban pyntrei kam ia ka ILP ha ka jylla.
U Bah Wellbirth Rani president jong ka FKJGP, haba bynrap ia ka jingkren jong u President ka KSU, u la ong ba ki 13 seng kin ia kynduh mynta ka miet ban ia kren ban ai jingmut sha ka sorkar halor ka jingthmu jong ka sorkar jylla ban wanrah ia ka jingpynkylla ia ka MRSS Act.
Haba jubab ia ki jingkylli la ong ba haduh mynta kim tip kiwei kita ki bynta kiba ka sokar kam pynkylla namar ba kim pat iohi, mynta kin ia shong kyrkieh bad kin ai jingmut sha ka sorkar ba ka ain kan long kaba khlain, kim kwah ia ka ain ban pynhun ia ki seng bhalang hynrei ki kwah ia ka ain kaba khlain ban iada ia ka jaidbynriew.
La ong ba ki 13 seng kin ai jingmut sha ka sorkar bad ka sorkar ka dei ban pdiang bad lada ka sorkar kam pdiang ki kum ki 13 seng ruh kin nym pdiang ia ka ain jong ka sorkar, la ong ba ka jingdawa ia ka ILP kam pat kut, ki pdiang ia kane ka MRSS Act ha kato ka por namar ka sorkar ha kato ka por ka sorkar kam sngewtynnad ia ka ILP.
