Shillong, Nailur 27: U symbut myntri rangbah u Bah Prestone Tynsong mynta ka sngi u la khot ia ka jingialang jong ki lai tylli ki District Council ha ka jylla, ka KHADC, GHADC bad ka JHADC, ha kaba la don lang u myntri kam pynroi sor u Bah Hamlet Dohling bad ka synjuk ki rangbah shnong ban ia kren halor ki kyndon shna iing.
Haba kren ha ki nongthoh khubor ha dien ba la kut ka jingialang, u symbut myntri rangbah u bah Tynsong, u la iathuh ba la bethah ia ki District Council ba kin phah noh ia ki kyndon shan iing hapoh shi bnai sha ka tnad pynroi sor jong ka sorkar jylla ba kin ioh ban peit bniah shuwa ban ai ia ki jingmynjur.
La iathuh ba ha kane ka sngi na ka liang jong jong ka KHADC kala dep ban ai ia ki kyndon shna iing sha ka sorkar. Ha ka juh ka por la iathuh ba la bethah ia ki District Council haba ki shna ia ki kyndon shna iing ki kyndon ki dei ban long katkum ki kyndon jong ka Ri baroh kawei ba ki kyndon kan long ka juh ha baroh lai tylli ki District.
Haba ia dei bad ka sertiphiket ban leit shnong noh ha ka iing kaba la dep ban shna ban ioh ia ka um bad ia ka light, u Bah Tynsong u la ong ba ha dien ka jingialang kaba la dep mynshuwa ka tnad pynroi sor kala thoh sha ka tnad sam um bad sha ka MeECL ba ka dei ban pdiang haba ki la ioh ia ka “ sertiphiket ban leit shnong noh” la ong ba mynta naduh ba phah ia katei ka shithih kam don shuh ka jingujor.
Haba ia dei bad kane na ka liang jong u principal secretary ka tnad pynroi sor un sa khot ia ka jingialang ia ka tnad sam um bad ia ka MeECL ban ia kren shuh shuh ia kane ka kam ban weng ia ka jingeh jong ki paidbah.
