Shillong, Iaiong 15: U myntri rangbah ka jylla u Conrad K Sangma mynta ka sngi u la iathuh ba la ioh ia ki 50 tylli ki Test kiba la phah sha Guwahati Medical College (GMC) baroh ki long Negetive. Mynta dang ap ban ioh sa ki 43 tylli ki test kiba la phah sha ka Barpeta Medical College.
U myntri rangbah u la iathuh ba baroh ki test kiba la shim ki long 118 tylli bad 68 tylli la ioh mynnih ka sngi ha kaba la pynthikna ba 6 tylli ki dei Postive kumba la dep ban iathuh paidbah. La iathuh ba baroh kito kiba don ka jingiatei la dep ban phah shong khop ia ki “Quarantine” bad ia kito kiba shu leit don kam ka jingwat jingtip ka dang iaid sha khmat.
Halor ka jingong ba slem ban poi ka bam na ka liang jong u myntri rangbah u la ong ba baroh ia ka bam la pynkhreh bad ba kin poi sha ki Islaotion Wards bad hapoh jong ki Corona Care Centre. U la iathuh ba la don ba ujor ba ka bam ka khlem poi haka por ba biang.
U myntri rangbah u la ong ba ka jingbym lah ban pynpoi ia ka bam ha ka por ba biang ka long ba ki don ki dong kiba la long ka daw jong ka jingthut namar ba kim shah ban mih bad kane kala pynlong ban nym lah ban poi ha ka por kaba biang.
Ha ka juh ka por u myntri rangbah u ai khublei ia ki paidbah baroh kiba la ai ka jingkyrshan ha kane kum kane por. U myntri rangbah u la ong ba tang ka sorkar marwei kan nym lah ban leh ei ei don kam ia ka jingiatreilang da kaba bat ia ka social distance.
