Shillong, Naitung 05: Mar syntip shaphang ka case COVID-19 ba nyngkong ha Meghalaya, ki ASHA bad kito kiba pynbiang ia ki kam jong ki, ki la ioh jinghikai kumno ba kin long ka bynta kaba kongsan ha ka jingwad ia ki case COVID-19 ha ki containment zone.
Ia kawei na ki case la lap ha ka shnong Mawtharia Pomlakarai kaba don 70 tylli ki longiing. Kane ka shnong ka don kumba 12 km na nongbah Shillong. Ym slem hadien ba la lap ia kane ka case ba la sdang ia ka Community COVID Management Committee ha kane ka shnong ha kaba i kong S. Kurkalang iba dei i ASHA i la long i bynta jong kane ka kynhun.
Ka kam jong i kong Kurkalang ka long kaba kongsan ha kaba i la lap haduh 35 ngut ki briew kiba don jingiadei bad i nongpang COVID-19. Haba la ai jingmut ia kine ki briew da ka COVID Committee ba ki dei ban shong marwei shuwa ha la iing (home quarantine), i la leit peit ia kine ki briew ha la ki iing jong ki bad i la buddien ia ka jingsumar jong ki bad kiwei kiwei ki jingdonkam jong ki.
Ha ka jingiatreilang bad kito kiba trei mon sngewbha ha ka shnong, ka kong Kurkalang ka la ai jingkyrshan ia ki nongshong shnong da kaba pynthikna ba ki ioh ia ki mar bam bad ka um dih.
Hapdeng kane baroh, ka la pynthikna ba kiwei kiwei ki kam jong i ki bteng beit kum ka jingai jingsumar ha ki iing ba don ki khyllung ba dang shu kha, ki longkmie ba armet, ki tymmen bad ki nongpang Tuberculosis, Hypertension bad Diabetes.
Ka la pynshlur ia ki longkmie ba kin leit kha khun ha ki hospital bad ka la pynshlur ia ki ruh ba kin pynthikna ba ki khyllung ba dang kha bad ki longkmie ba armet kin ioh ki dawai bad ka jingsumar kaba biang. Da ka jingkyrshan jong ki bor jong ka shnong, i la bteng beit ia ki kam jong i ha kajuh ka por ba i trei ruh ia ki kam ba iadei bad ka COVID-19.
Kane ka la pynthikna ba ki kam ki bym iadei bad ka COVID-19 kim shah ktah. Namar jong ka jingiatrei lang jong ka shnong bad i nongtrei ASHA, ka shnong Pomlakarai mynta ka la lait na ka COVID-19. Kito kiba trei ia ki kam ban iada ia ka Meghalaya na ka khlam COVID-19 ki la shim ia ka bynta kaba khraw ban tehlakam ia ka jingpur jong kane ka jingpang.
Ka jingialeh pyrshah ia kane ka khlam ha kane ka jylla ka la pyni ia ka jingiadei kaba jan hapdeng ki ASHA bad ki shnong. Kumba 6700 ngut ki nongtrei ASHA ki la don bynta ha ki kynhun COVID Village Health Awareness bad ki kynhun Active Case Search ha ki jaka Containment.
Kine ki kynhun ki la kyntiew ia ka jingtip ha ki shnong shaphang kane ka jingpang bad ki lad ki lynti ban iada ialade na ka khlam COVID-19 kum ka jingpyndonkam ia ki jingda khmat, ka jingsait ia ki kti bad ka jingpynjngai iwei na iwei. Lyngba ka jingwad ia ki nongpang, ki la plié lad ruh ban pynbiang ia ka jingtest bad ka jingsumar ha ka por ba biang.
