Shillong, Nailur 26: Kumba ka long mynta ka jylla Meghalaya ka don 6804 ngut ki ASHA kiba don ha kylleng jong ka jylla bad kine kim ioh da ka tulop hynrei ki ioh ia ka jingiarap katkum ka kam kiba ki trei.
Ki don ki bynta kiba la pynkhamti ha ki lyngba ka tnad ka koit ka khiah kaba ki dei ban leh ban iarap ha ki bynta bapher bapher ha ka liang ka koit ka khiah sha ki shnogn ki thaw ha baroh kawei ka jylla.
Na ka bynta ka snem mang tyngka 2019-2020 ka sorkar kala dep ban pynlait T.28.26 klur bad ha kane ka snem mang tyngka 2020-2021 la pynlait ia ka pisa ban siew sha ki haduh T.23.70 klur, ka bhah kaba ka sorkar jylla kala pynlait ha u snem mang tyngka 2019-2020 ka long T.2.82 klur bad snem 2020-2021 ka long T.2.37 klur kaba dei 10% ka bhah jong ka sorkar jylla.
Haba ia dei bad ka bhah kaba ka sorkar pdeng kala phah sha ka jylla, na ka bynta u snem mang tyngka 2019-202o ka long T.25.44 klur katba na ka bynta u snem mang tyngka 2020-2021 ka sorkar pdeng kala phah T.21.33 klur, kane ka dei ka jubab u bah Prestone Tynsong Symbut myntri rangbah ha kane ka sorkar ba dang shudep shem kaba la kylli da u bah Process T Sawkmie.
