Shillong, Jylliew 25: Mynta ka sngi u myntri kam poh iing ka jylla bah Lahkmen Rymbui haba plie ia ka jingrakhe ia ka jingdap shispah snem jong ka balang Unitarian ha Nongthymmai la ong ba ki balang ki dei ban wanrah ia ka jingkylla ha ka sian pyrthei ha ka jylla.
Ha ka jingkren jong u kum u kongsan u la ong ba ki balang ki dei ban shim ia ki lat ki lynti ban hikai ia ki briew kumno ban jied ia ki nongmihkhmat namar baroh ki kren ba kumno ka pisa kan treikam ha ka por elekshon, kumta ki balang ki don ka bynta kaba khraw kumno na hikai ban jied ia ki nongialam.
Kum ki nongialam balang ki dei ban kren ia ki briew jong ka balang bad ba kin kren ia kane khlem riej bad ban kren u no u kyrtong u ba lah shisha ban wan rah ia ka jingkylla ha ka imlang sahlang bad ha ka jylla, la ong u bah Rymbui myntri kam poh iing.
La ong ba bun na ki briew kiba kwah ban ia shim bynta ha ka sian pyrthei kim sngew tynnad ia ka rukom lang kaba mynta ha kaba jied ia ki nongmih khmat ia kaei kaba la jia ha jylla. U la buh ka jingkylli ba dei ban pyrkhat ba kwah ban ioh ia ka imlang sahlang kaba kumno ha ki sngi ban wan.
Ki Balang ki dei ban ia kren kumno ki MLA bad ki MDC kaba ki paidbah kila jied kin lah ban leh ei ei na ka bynta ka jylla, kimd ei ban ia kren katno ka pisa u don u ne ka kyrtong ia kane dei ban shim khia da baroh ki jaid balang.
Ha ka jingkren u bah Vincent H Pala MP bad u MLA u bah Charles Pyngrope kila kren ba kumno ka balang kala kyntiew ia ka imlang sahlang ban kyntiew ia ka riti dustur ia kaba la seng da u bah Hajom Kissor Sing Nongbri ha u snem 1887. U babu Hajom u la thoh ia ka Dikshonari Phareng Khasi ha u snem 1904 bad ha u snem 1920 la thoh da u Nissor Sing.
U nongialam jong ka Unitarian Union jong ka North East India u Rev Derrick P Pariat, u la kren kyllum ha kaba ia dei bad ka balang Unitarian Church ha Nongthymmai bad la pynkynmaw ia ki bynta ba la leh da ar ngut ki long kmie ka kong Kharbithai bad ka kong Yen Nongkhlaw bad kiwei ki sa bud ha dien.
Ka jingsdang jong ka Unitarian ka dei ka jingwan rah ia ka jingkylla ha ka Protestant ha ki 16 spah snem, ha kaba ki briew ha ri Europe kila pyrshang ban batai ia ka Bible katkum ka jingsngewthuh jong ki, ka phang pdeng ba ka Unitarian ka ieng ka long ha ka jingiatyli u blei bad ki pyrshah ia ka jinglong lai ha u wei u blei kaba kiwei ki khristan ki ngeit.
