Shillong, Iaiong 27: U Symbut Myntri Rangbah ka jylla u bah Prestone Tynsong mynta ka sngi u la ong ba ka sorkar kala shim ia ka rai ba ki Civil Hospital ha ka jylla, khatam ka Shillong Civil Hospital, Jowai bad Tura kin sdang noh ban sumar
ia kiwei ruh ki nongpang kumba juh long.
U bah Prestone u la batai ba hapoh Civil Hospital ki don lai ngut kiba shah sumar COVID-19, ia kine ki lai ngut la buh kham jngai na ka jaka shim dawai paidbah bad ki nongtrei kiba la buh ban sumar ia kine ki lai bad kin nym ia khleh bad kiwei.
u bah Prestone Tynsong u la iathuh ba ka sorkar ka la bthah ia ka tnat ka koit ka khiah ban pyntreikam biang ia ki baroh ki hospital ha ki district ban sumar ia baroh ki jait jingpang. U la ong ba watla ka sorkar ka la pynkhreh ia kine ki jaka sumar na ka bynta kiba shah ktah ha u Covid 19, hynrei hadien ba la bishar bniah biang ka sorkar ka la rai ba kine ki hospital ki dei bantreikam kumba julong barabor.
U la ong ba ia ki jaka kyrpang ba la pynkhreh ha ki Civil Hospital na ka bynta kiba shah ktah ha u khniang Covid 19 ruh kin don lang, hynrei dei ban pynjngai na kiwei pat ki nongpang bad ki nongtrei ne nongsumar kim dei ban iakhleh lang.
Haba ia dei bad kiba shitom COVID-19 ka sorkar jylla kan sap hah test biang ia ki ha dien 14 sngi bad kane ka long ban pynthikna ba kine ki briew kila koit na kane ka jingshitom. Lada kim don ei ei yn sa phah test biang hapoh ka 24 kynta ban pynthikna ba kila koit.
Na ka liang u Director of Health Services (DHS), u Dr Aman War u la ong ba watla mynta 5 sngi ym shym la don ba shah ktah shuh na u khniang Covid 19 ha ka jylla, hynrei ka tnat ka koit ka khiah ka long kaba phikir bad husiar ban lait na kino kino ki jingma.
