Shillong, Rymphang 16: U lat jong ka jylla ha u snem 1982 u la thung ia ka ‘Commission” katkum ka sub-paragraph (1) jong ka paragraph 14 jong ka khyrngit kaba hynriew jong ka Riti synshar jong ka Ri India ban tohkit ia ka jingtrei kam jong ki District Council ha ka jylla Meghalaya.
Ka jingthung ia ka “Commission” ha katei ka snem da u lat jong ka jylla, kala kren shai ba na ka liang jong u Lat ka jylla u don ka jingpyrkhat ba ka long kaba don kam ban dang pynkhlain shuh shuh ia ka jingtrei kam jong ki District Council ha ka jingtrei kam jong ki.
Khamtam ha ka imlang sahlang, ka pule puthi, ka ioh ka kot jong ki jaidbynriew riewlum bad khamtam eh ia ka riti dustur katkum ka jingthmu jong ka khyrngit kaba hynriew jong ka riti synshar jong ka Ri India, dei halor kane ka nongrim la thung ia ka Commission kaba khlieh da u Chief Justice SK Dutta kum u lamphang, u IK Sangma, DS Shallam bad Dr BR Kharlukhi kum ki dkhot ka Commission.
Kane ka Commssion kaba la thung ha katei ka por, kala shim por ar snem ban pyndep ia ka jingwad bniah jong ka ha kaba ia dei bad ka jingtrei kam jong ki lai tylli ki District Council kiba don ha kane ka jylla Meghalaya, ka KHADC, JHADC bad ka GHADC. Ia ka kaiphot la aiti sha ka sorkar ha u snem 1984.
Ki phang kiba ka Commission kala tih bniah, ha kaba ai dei bad ka KHADC, ka long, ka jingtrei kam jong ka khyrngit kaba hynriew ha Khasi Hills Autonomous District, ka jingpyn pyntrikam ia ki ain, ki rule bad ia ki kyndon, la ai jingmut ruh ban don ia ki ain kiba kyrpang, ki lat jingsumar, ka pule puthi bad ki lynti syngkieng bad ka khatduh ka jingpyniaid ia ka District Council.
Katba ka jingwadbniah ba ka Commission kala leh na ka bynta jong ka JHADC, ka long ka rukom bat khydnew, ka jingpyntreikam ia ki katto katne ki ain, ka pule puthi, ki lad jingsumar, ki lynti syngkieng bad ia ka riti dustur.
Haba ia dei bad ka JHADC, ka Commission kala wad bniah ia ka rukom bat khydnew, ka jingpyntreikam ia ki katto katne ki ain, ka pule puthi, ki lad jingsumar bad ki lynti syngkieng bad ia ka riti dustur.
Ka Commission kaba la ai ia ka kaiphot sha ka sorkar ha u snem 1984 kala buh ka jingmaham ba ki District Council ha Meghalaya kim sa iap hi bad ka Commission naduh katei ka por kala ai jingmut ba ia ka Sixth Schedule la dei ban pynkylla bad kila kdew ruh ia ki bynta ba don kam ban pynkylla.
Katkum ki thymmei khubor kiba u SP News Agency u la ioh, la ong ba ka sorkar naduh katei ka snem haduh mynta kam shym la leh ei ei ha kaba ia dei bad ka jingai jingmut jong ka Commission, u SP News Agency u la ioh ia ki kotpi jong ka kaiphot jong ka Commission kaba don ar bynta “Volume 1 bad Volume II”.
