Shillong, Kyllalyngkot 04: ka kynhun Working Group III, jong ka Meghalaya State Planning Board, hapoh ka jingialam jong u bah John F Kharshiing, Co-Chairman, mynta ka sngi kala khot ia ka jingialang ban bud dien ia ka jingiakren ha pdeng u Dr Mukul Sangma Myntri Rangbah ka jylla ka Synjuk ki Rangbah Shnong bad ka KHADC kaba la long ar sien ha u bnai Nohprah 2017 ha kaba ia dei bad ka Building Bye Laws ha ki Sixth Schedule Areas.
Ha kane ka jingialang la don long ki briew jong ka tnad pynroi sor, ka tnad ain bad na ki District Council, ka jingiakren ka long namar ba kala don ka rai jong ka High Court kaba la mih ha ka 16.2.2017 ha kaba ia dei bad ka jingtrei kam jong ka Building Byelaws ha ki jaka ba hap hapoh jong ka Master hapoh jong ka jylla Meghalay.
Ha kane ka jingialang na ka liang jong u Co-Chairman, u la ong ba shen ka sorkar kan sa phah jingthoh sha ki District Council ba kin thaw noh ia ki Town Committee katkum ka United Khasi bad Jaintia Hills Autonomous District Council Town Committee Act 1962 namar ki don ka bor ban pynbeit ha kaba ia dei bad ka jingshna ia ki iing ki sem bad ba kin phah ia ki kyndon sha ka sorkar lada ki don ban dup lah ban pynlong kawei lada don.
Haka juh ka por na ka liang jong ka SPB kala ai jingmut namar ka jingduna ki briew ba ka sorkar kan pynbiang ia ki briew ha ki jaka nongkyndong ba kin iarap ha kaba pyndro ia ka iing shuwa ba kin shna ban pynsuk ia ki paidbah ha ki nongkyndong. Ha ka juh ka por la ai jingmut ba ia ki ophis jong ki BDO kin iarap ia ki Town Committee ban pynkloi ia ka kam ia kito kiba hap hapoh jong ka KHADC.
Na ka liang jong ka SPB kala kyntu ia ki bor jong ka KHADC ba kin thaw noh ia ki Town Committee bad ban phah ia ki sha ka sorkar khnang ba ka sorkar kan dup lah ban ai bor ia ki katkum ka kyndon 2 (i) jong ka Meghalaya Town & Country Planning Act 1973 kaba la ai bor ia ka sorkar ba kan ai ka jingithih ia kino kino ki bor ban ia rap ia ki bor sorkar ban pyntrei kam ia katei ka ain.
Na ka liang jong u Bah John Kharshiing Co-Chairman jong ka SPB u la kyntu ia ki District Council ba kin pynkylla sha ka kti kaba sngewthuh paidbah ia ka united Khasi & Jaintia Hills District Establishment jong ki Town Committee Act bad Rules 1962 khnang ba ki rangbah shnong sha ki nongkyndong kin sngewthuh ia ka jingthmu jong kane ka ain khamtam ia ki Town Committee kumno ka trei kam ha ki jaka kiba hap hapoh ka jingpeit jong ki District Council.
