Shillong, Jymmang 12: Ki team ki ban ia shim bynta ha ka jingialehkai ia kaba la jer kyrteng ka “Meghalaya Baby League 2018” baroh ki don 12 tylli kine ki team kiba la shah jied ki long kiba la pynbit pynbiang katkum ki kyndon ba la buh da ka Meghalaya Football Association (MFA).
Kiba la wan ban ai kyrteng na ka bynta kane ka Meghalaya Baby League 2018, kila long na ki seng, na ki skul bad u khlur nongialehkai ka Ri India u Eugeneson Lyngdoh u la wan lang ban pynshyngian.
Ki team ki ban ia shim bynta ha kum kane ka jingialehkai kynjat ball kaba nyngkongeh ki long, ka Touchline NE, Langsning Greenergy, United Gorkha FC, Nongthymmai Football Grassroots Centre, EugenesonLyngdoh’s team, Kick Start Football Academy, Nongtrai Sports Club, Littlestar Academy, JNS Grassroots Centre, Sunnydale School, Mawlat SC bad ka Wahlakhiat SC.
Ia kane ka jingialehkai Baby League la lah ban pynlong da ka jingiatreilang jong ki lai tylli ki kynhun ka philanthropic organisations, ka Tata Trusts , ka MFA bad ka All India Football Federation (AIFF). Ka jingthmu hi ka long ban pynlong ia ki khynnah naduh 4 snem haduh 13 ba kin sngew tynnad ban ia lehkai kynjat boll bad kane ka jingialehkai kan iaid na ka bynta hynriew bnai ban pynrung ha ki khynnah ia ka mynsiem ialehkai kynjat bol shuwa ba kin rung sha ka jinglong khynnah.
Ka jingialehkai kan long 5 lane haduh 7 ngut ki khynnah na kawei ka kynhun ka shong ha ka rta jong ki. Ki rta hapdeng 4-5 bad 5-6 kan long 5 ngut shiteam bad ar team kan long 10 ngut, ki khynnah kiba la kot sha ka 8-9 bad 10-11 snem bad kiba la kot sha ka 12-13 snem kin don 7 ngut ha kawei ka team bad ki don kam ban don 12 ngut ki nongialehkai ha kawei ka team.
Ka jingialehkai kan long kum ha ka sngi thohdieng ba kan nym ktah ia ka por jingpule jong ki khynnah bad na kine la mang kyrpang 10 % na ka bynta ki khynnah kynthei. Ka MFA ka sngew kmen ban iohi ba bun kila wan ban ai kyrteng ha dien ba la pynbna ban pynlong ia ka Meghalaya Baby League.
