Shillong, Lber 01: Ka jingia kop ia siat suloi ka 6th Meghalaya State Shooting Championship 2021 kaba lai sngi ka la kut mynne ka 28 Rymphang 2021, ha kaba ki nongiashim bynta baroh ki long 25 ngut.
Na kine 17 ngut ki Shooting Athletes ki la ioh takma ha ki jingiasiat ia kop 10M Air Rifle Men (NR), 10M Air Rifle Women (NR), 50M Rifle Prone Men Individual (NR), 10M Mixed Team Air Rifle, 10M Air Pistol Men Individual (NR), 10M Air Pistol Women Individual (NR), 25M Pistol Championship Women Individual (NR), 25M Pistol Championship Women Individual (NR), 10M Air Pistol Youth.
Shwa ban sam ia ki khusnam ka kong. I. Mawthoh, Branch Head, North East Small Finance Bank, kala ai ka sponsorship cheque kaba 7 lakhs ban ioh thied ia kawei ka Small Bore Sports Rifle rynkat ki kit bad accessories, ha u Dr. D. Vijay Kumar, IAS, Commissioner, Sports, GoM, ia kaba la aiti ha u Bah. John F Kharshiing, President, Shooting Association of Meghalaya.
Ha ka jingkren kum u shongknor u Dr. D. Vijay Kumar, IAS, Commissioner Sports, GoM, ula ai khublei ia ka Shooting Association of Meghalaya ia ka jingsdang biang ia ka championship hadien ba la shah khang jan shisnem ha ka khlam corona kaba la buh ia baroh ha ka pyrthei ha ka jingeh kaba khraw.
U la ai khublei ia baroh ki nongjop ki nongia shimbynta bad u la kyntu ia baroh ba kin trei shitom ban wanrah ia ka burom ia ka jylla. U la ong ba kumba ka paw mynta namar ba sdang duna ka jingpang corona ka Govt of India ka la shah ia ki Katto katne ki jingialehkai ban sdang noh ia ki jingialehkai halor ki kyndon kiban bthah da ki bor district.
U ong ba na ka liang ka tnad Sports Department, ki khmih lynti ba ki kam ia lehkai kin sdang biang hapoh ka jylla bad ba ka sorkar kan sh baroh ki lad ban iarap ban kyntiew ia ki kam kilan met hapoh ka jylla kum shi bynta ban kyntiew ia ki samla.
U la ong ba ka sorkar ka dang iai khmih bniah ia ka jinglong jingman ka khlam corona u la pyntip ba ka sorkar ka dang iai ap ia ka jingshai na ka Indian Olympic Association bad ha ka juh ka por ka tnad sports department ka la nang pynkhreh ia ki jaka ialehkai na ka bynta kiba bun ki jingialehkai na ka bynta ka National Games 2022 bad u la iai kyntu ia ki sports associations ban pynkhreh ia ka National Games.
U la ai khublei ia ka North East Small Finance Bank kiba la wan shakhmat ban kyrshan ia ka Seng Shooting Association of Meghalaya na ka bynta ba kin ioh thied ia ki suloi kiba rem dor ha ryngkat ki accessories bad u la kyntu ia ki ban bteng ka jingkyrshan namar la paw ba kane ka jingialehkai ka don ka sap hapoh jylla.
U la kyntu ia kiwei ki financial institutions ban wan shakhmat ban synniang ha kaba iadei bad ka development of Sports hapoh jylla bad u la pynkynmaw ba ka tnad sports ha ryngkat ka MSOA ki la pynlong ia ka National Games Summit 2019 ha Shillong kaba la plie lad ia ki Association ban ia kynduh ia ki company kiba don ka bor ban synniang na ka bynta ka sports development.
La kyntu ia ka MSOA ban sdang bad ban bteng buddien biang ki jingiakren kun shibynta ban plie lad na ka bynta ki jingiarap ha kaban tei ka ka Sports. U la kyntu ia ki sports association ban pyniar bad ban pynlong ki program awareness ne ki jingialehkai ha baroh kawei ka jylla khnang ban ioh sei ia ki sap kiba kyrpang bad ba ka sorkar kan iai kyrshan katba lah ei ha kaban iarap.
U Chief Guest Dr D.Vijay Kumar, IAS, Commissioner, Sports &Youth Affairs, Government of Meghalaya, i Smt. I Mawthoh, Branch Head, North East Small Finance Bank, u Shri. Lano Ignatious, Adviser Shooting Association of Meghalaya, bad ki office bearers jong ka Shooting Association of Meghalaya, ki la ai ia ki khusnam takma ia ki nongjop.
U President, Bah John F Kharshiing, u la ai khublei ia ki longheh ka 58 GTC kiba la plie lad ban pynlong ia shibynta jong ka Championship ha ka short range ha Madanryting. U la ai khublei ia u Commissioner Sports, GoM bad ia i Branch Head, NESFB, na ka bynta ka jingpynlait por kaba kyrpang jong ki na ka bynta ka sngi pynkut jong ka Championship.
U la ai khublei ia ki nongiasiat bad ki kmie kpa jong ki kiba la shah bad kiba la wan shakhmat ban ia shim bynta wat hapdeng ki jingeh ban ai lad ia ka Association ban sdang bad bteng biang ia ki program bapher bapher jong ka kam jingiasiat ia kop hadien ka jingshah khang dam kaba shisnem bad u la ai khublei kyrpang ia ki nongkitkam kiba la pynlong ia kane ka jingiasiat ia kop kaba jop. La ioh ia ki kyntien pynkut na u Bah Neil Sootinck, General Secretary, Shooting Association of Meghalaya.
