Shillong, Niawieng 02: U bah AL Hek myntri ka koit ka khiah jong ka sorkar jylla haba plie ia ka jingialang ha kaba ia dei bad ka MSME kaba la khot ban pynlong da ka State Bank jong ka Ri India mynta ka sngi ha Yojana Bhavan, u la ong ba ki don bun ki lad ki lynti ban kiew ka shnong haphi kumno ban leh.
U myntri ka koit ka khiah u la ong ban poi sha ka jingjop kam don lynti lyngkot ban iaid ban poi sha ka thong ha ka jingim hynrei kaba don kam dei tang ka jingtrei shitom, ia kane u la kren namar kiba poi sha kane ka jingialang baroh ki dei kiba seng iala ki jong ki kam ki jam.
U la ong ba kum ki briew kiba seng ia la ki jong ki kam da ka jingbei pisa na ki bank ha ka dur jong ka ram, u la ong, kiba shim ki dei ban trei shitom ban ialeh katba lah ban siew ia ka ram khang ban kiew ha ka kam kaba trei.
Hapoh kane ka MSME, ki don bun jaid ki skhim kaba ki paidbah ki lah ban seng ia la ki jong ki kam da kaba shim ia ka jingiarap na ki Bank ha ka dur jong ka ram, ban kiew ha ka kam ka jam ka shong ha ki shimet shimet kumno ban kiew ha ka khaii pateng.
U la ong ruh ba na ka liang jong u myntri rangbah duh jong ka Ri u Narendra Modi u la wanrah bun ki jaid skhim ban weng ia ka jingeh ha ka jingbymioh kam ioh jam bad ha kajuh ka por ban kyntiew ia ka khaii pateng ban kiew kaioh kakot ha ka Ri India.
Ha kane ka sngi u mytnri u la sam ruh ia ki shithi ioh ram sha ki ba bun ki briew kiba seng ia la ki jong ki kam ki jaka ha ki ruko bapher bapher katkum ka kam kaba ki thmu ban seng.
