KI JINGEH BA KA SORKAR THYMMAI KAN IAKYNDUH HA MEGHALAYA Babu Kular Khongjirem

Ki political Party bapher bapher  ki la sdang ban shongshit  ban pyrkhat ban ioh thaw ne shimti ia ka  Sorkar thymmai  ha Meghalaya hadien ka MLA Election  2018. Ka party Congress, UDP- HSPDP Alliance, ka NPP, ka BJP haduh ka party thymmai, ka PDF  ki la ia peit bad khmih lynti kliaw  da kumno ban ioh thaw sorkar hadien ka MLA Election.  Mynta ki dang ia pyrshang ban thawbuit thawlad kumno ban leit pynbiej biang da ki buit laiphew jait lyngba ki ktien jali jaum sha ki paidbah nongthep vote, khnang ban pynngeit biang ia ki ban  jop  ia ka Election 2018.

Kino kino ki party ki ban shimti ia ka Sorkar thymmai hadien ka MLA Election 2018 kin iakynduh lypa ia ki jingeh kiba khraw ha ki por ki ban wan. Ka jingduna pisa (Financial Constraint) ba shu leh lutphut da kane ka Sorkar ba mynta (MUA-II) kan buh jingeh bha ia ki ban shimti ia ka Sorkar   ha u snem  2018. Ka jingsiew tulop thymmai (new revise pay) kumba la ai jingmut (recommendation) da ka 5th Pay Commission ka la buh jingma lypa ia ka Sorkar ban wan. Tangba, lada u Chief Minister bad ka Sorkar jong u kim lah ban ai sngewbha Khristmas (Christmas Gift) ia ki nongtrei sorkar (Govt. Employees), kan long kaba eh ia u ban pyniohjingshaniah biang ba kin bud ia ka party jong u ha ka Election 2018.

Ki don bun bah ki diengpyngkiang kiba ka Sorkar Thymmai ka dei ban iaid lyngba. Ka jingkhang tih Dewiong ka NGT ka ktah bha khamtam sha ki District ka Jaintia Hills baroh kawei. Ka BJP kum ka party kaba don ha ka bor sorkar Pdeng (Central government) ka nang bha ban riam (trap) bad ban khyrwait shabi da kaba kular ban pynlaitluid (free) na ka jingshah teh ha ka NGT lada ka wan ha ka bor kum ka Sorkar Thymmai hadien ka MLA Election  2018. Lyngba kane ka buit sianti (Political tactic), ka BJP imat kan trei kam bha ha Jaintia Hills bad u ’tiew u Lotus un sa mih paw ha ki ba bun ki pung (Constituency) jong ka Ri Jaintia.

Ka jingiakhih ki Seng bhalang kum ka HYC ban pyntreikam bad pynkhie im biang ia ka ILP kan buh jingeh bha ia ka Sorkar thymmai ha Meghalaya. Kumba long mynta, ki HYC ki leit pynthut (rah placard) sha man la ka function ba ki Minister ne MLA kyrshan sorkar ki leit plie Mawnongrim ne leit jingialang. Ka Entry and Exit Point jong kiwei pat ki Sengbhalang  ruh ka dang don ha suin mynta. Lano yn pynlong kam ia ka ym pat lah satia ban batai haduh mynta. Lada ki MLA kiba don ha Opposition kin kohnguh (committed) kan long kaba eh ia ki ba kin pynurlong ynda haba  ki la don ha ka Sorkar hadien ka Election 2018.

Ki dang don bun ki kam ba dang sahteng kiba kane ka sorkar ka la shu ieh pongding (Keep on pending) khlem poi shano shano ruh. Ka VAB jong ka synjuk ki Rangbah Shnong imat kan shu kylla kamkai noh baroh. Ka jingkyntur pud (Encroachment ) jong ka MUDA sha ki jaka khap sor ruh kin buh lypa ia ki jingeh ha khmat ka Sorkar thymmai.

Ka jingplie Civil Sub-Division, Police Station, Police Outpost, C &RD Block etc. ha man la ki jaka da kane ka sorkar kaba mynta ka la pynlyngngoh ngain ia ki paidbah ba bun ba lang. Nalor ka jingud duna pisa hynrei ka kam pat ba ki leh ka long kumba shlei palat ka pisa sorkar. Ka dei ka sorkar “bam hati kit kulai”. Ynnai iakren ia ki jingleit buh Mawnongrim bad ka jingot ribbon shaid shaid man la ka sngi da u Chief Minister bad ki Minister jong u. Shano kane kan ialam? Mano ban kitkhlieh bad kitpap ia kat kine ki jingleh lutphut? Hato kam dei ka Sorkar thymmai ka ban shimti hadien ka MLA Election  2018? Ngim lah sngewthuh shuh kane ka jingleh ka dei ka jingleh khnang ne jingleh kput jong kane ka Sorkar ba mynta namar ka sngewthuh shai ba kam ioh  shuh ia ka Sorkar nangne shakhmat?  Kum kine kiei kiei  ki ia rung ia mih ha ka jingmut jingpyrkhat jong ki paidbah  bad kum kine ki  jingleh kyrkieh hak-dak, lada kim wanrah ia ka jingbha bad jingmyntoi ia ki paidbah kin kylla long pynban ka jingpynjot thiaw ia ka State jong ngi.

What Next?

Recent Articles

Leave a Reply

Submit Comment
*