Shillong, K. Lyngkot 24:Ka Plenary kaba 69 jong ka North Eastern Council ia kaba la plié da u Myntri Sorkar Pdeng ba dei khmih ia ka tnat Kam Pohiing, u Amit Shah ka la kut noh mynta ka sngi.
Kane ka Plenary kaba 2 sngi ka la peit bniah ia ki kam kiba iadei bad ka jingsaindur ia ka roi ka par ha ka thain shatei lammihngi bad la iakren ruh shaphang ka jingiaid shaphrang ha ki projek bapher bapher kiba la pyntreikam ha ka thain.
Ha katto katne ki teknikal session ba la long, ki jingiakren ki ban bha ha ki projek kiba iadei bad ka jingkyntiew ia ki lad kamai, ki kam ba seng hi da ki riew shimet, ki jingdon jingem, ki lad ka leit ka wan bad kiwei kiwei ki kam kiba iadei bad kine ha ka thain.
Ha ka jingkren jong u, u Myntri Khynnah jong ka Sorkar Pdeng ba dei khmih ia ka that Development of North Eastern Region (DoNER), Myntri Khynnah MoS PMO, Personnel, Public Grievances, Pensions, Atomic Energy & Space, u Dr Jitendra Singh u la ban biang halor ka jingthmu jong u Myntri Rangbah Duh ka ri, u Narendra Modi na ka bynta ka roi ka par ha ka thain shatei lammihngi bad ka jingkyntiew ia ka thain sha ka kyrdan jong kiwei kiwei ki jylla kiba la kham kiew.
U Myntri u la ong ba ka thain baroh kawei ka la mad ia ka roi ka par kaba stet hapoh ka jingialam jong u Myntri Rangbah Duh ha kine ki 6 ne 7 snem ba la dep bad ba kane ka dei ka dak jong ka jingsngew ha kylleng ka ri ba ka thain shatei lammihngi mynta ka don ha ka lynti sha ka roi ka par.
Hynrei u la ong ba ki jingkyrmen ki long kiba bun bad ba u Myntri Rangbah Duh u kwah ban kham urlong shuh ki kam. U la ong ba u ngeit skhem ba lyngba ka jingkut jingmut jong ki jylla bapher bapher bad ki tnat Sorkar Pdeng bapher bapher, ka thain shatei lammihngi kan lah ban jop ia ki jingeh bapher bapher ha kine ki por ban wan.
U la ong ruh ba u dap da ka jingsarong haba u lah ban pyni da ki kam ia ki jingkular kiba la buh bad ban pynurlong ia ki jingangnud bad ban poi sha ki kyrdan kiba thymmai lyngba ka jingiatreilang bad ki tnat kiba iadei kam bad ka DoNER bad kiwei kiwei ki briew kiba don bynta ha kine ki kam.
U Myntri u la sngap ia ki jingai jingtip ba la ai da ki ophisar jong ki tnat Sorkar Pdeng bapher bapher bad u la kyntu ia ki Secretary jong kine ki tnat Sorkar ba kin ai jingiarap katba lah ia ki jylla ka thain shatei lam mihngi.
U Dr.Singh u la ong ba ka thain kan ialam lynti ha ka roi ka par jong ka India ha ka por ba ka pyrthei baroh ka wad ia ki lad ban pynkhlain biang ia ka ioh ka kot hadien ka khlam COVID.
U Dr. Singh u la ong ba ka thain kan khring bha ia kito kiba leh business ha India hadien ka khlam bad ba ki siej kin long ki rishot jong kine ki kam kiba iadei bad ka ioh ka kot.
Hynrei u la kyntu ia baroh ki jylla ba kin pynkhreh ialade ba kin ioh jingmyntoi katba lah bad pyndonkam ia kane ka kabu ksiar ha ka thain hadien ka khlam.
U Myntri u la kyntu ruh ia baroh ki jylla ba kin pyndonkam ia ka pisa ba la mang da ki tnat Sorkar bapher bapher khnang ba baroh ki briew kin ioh jingmyntoi na ki skhim bapher bapher.U Myntri u la ong ba ka rukom pyndonkam ia ka pisa hapoh ka NEC ka ai mynsiem bad u la ong ba u dap da ka jingkyrmen ba ia ka pisa ba wan lyngba kiwei kiwei ki tnat Sorkar ruh yn pyndonkam ha ka rukom kaba seisoh bha.
