Shillong, Kyllalyngkot 24: Mynta ka sngi ka MPLU bad ka JCCCA kila leit ban ia kynduh ia u Chief Executive member jong ka KHADC u Bah Latiplang Khorkongor ban ia kren halor ka jingwan kamai ki kali kiba na sha bar sha Meghalaya ym tang ki Tourist Taxi hynrei wat ki kali shimet ruh ha kaba ka sorkar jylla kam ioh ei ei na ki.
Haba kren ha ki lat pathai khubor u Bah Erwin K Sutnga, ha dien ka jingiakynduh ia u CEM jong ka KHADC, u la ong ba ka jingiakynduh na ka liang jong ki ar seng ka long ban pyntip sha u ba bun ki kali na sha bar ki wan kamai sha kane ka jylla khlem da don ia ka Labour License.
Kaba kham pynduh nongshuh ka long ba ki kali shimet kiba wan na sha bar ka jylla Meghalaya ki wan kamai sha kane ka jylla khlem da ioh ei ei ka sorkar jylla ne na kato ka jylla kaba ki register ia ki kali.
Ha kane ka jingiakynduh la pynsngew ha u CEM ba ka dei ban don ka jingiatreilang ha pdeng ka sorkar jylla bad ki District Council ban khanglad ia ki kali ba wan rung na shabar ban kamai suk ha kane ka jylla namar ka ktah ia ki trai shnong.
Halor kane ka jingwan kamai ki kali bana shabar sha kane ka jylla kine ki ar tylli ki seng kin leit ban ia kynduh ia ka sorkar ban dawa na ka sorkar ba ka dei ban leh kumba leh ka jylla Sikkim, Arunachal Pradesh, ka Darjeling bad Assam ba ki kali sha bar kim lah ban leit rung sha ki jaka jngohkai pyrthei.
Lada kitei ki jylla ki lah ban leh balei ka jylla Meghalaya kam lah ban leh, kumba ka long mynta tang Khasi bad Jaintia ki don palat 18000 tylli ki kali kamai, lada lah ban khang ia kane ka jingmyntoi kan long ia ki trai shnong.
Ka MLPU bad ka JCCCA kan ai jingmut ruh sha ka sorkar ha kaba ia dei bad ka ain Motor Vehicle Rule kaba ka sorkar ka dang pynkhreh mynta, na ka liang jong ka seng ba kin ai jingmut lem ban peit ba ki paidbah kin nym sha ktah palat.
