New Delhi, Lber 08: Ka ktien ‘startup’ ka dei kaba la sdang pawnam ha ki snem 1990 bad kane ka la sdang namar ka ‘dot-com’ bubble. Katba ym don kawei ka jingbatai kaba shaiia baroh shaphang kane ka ktien, bun kiba sngewthuh ba kane ka mut ia ki kam khaii ba thymmai.
Katkum ka DPIIT, yn khein ‘start-up’ iakanokano ka kynhun haduh 10 snem na ka sngi ba la seng, kyntiew kyrteng bad haba ka kamaikajih jong ka kynhun ha unouno u snem mang tyngka kam tam ia ka T 100 klur.
La khmih ba ki startup kin peit bniah ia ka jingsaindur thymmai bad ka jingpynbha ia ki mar, ki jingai jingshakri, ki rukom trei bad ki don ka bynta kaba khraw ha ka roi ka par jong ka ioh ka kot bad ka roi ka par kaba iaineh.
Ki pynmih lad ioh kam, kyntiew ia ka jingiasoh ha ka imlang sahlang bad pynduna ia ki jingiapher ha ki jingkamai. Ki don ka jingkiew shaphrang ha ki kam teknikal bad ka jingkiew ka ioh ka kot ha ki iew kiba la skhem bad kito kiba dang mih mynta. Ka ioh ka kot ha ki kam startup ha kylleng ka pyrthei ka dei kaba wan na ka jingkiew shaphrang bad ka jingsaindur thymmai ki startup.
Ym lah ban len ba ki startup ki dei kiba pyntyllunia ka jingkiew ka ioh ka kot jong ka pyrthei namar ka jinglah jong ki ban wanrah mardor ia ki jingpynbeit kiba la saindur thymmai. Lyngba ka jingkyrshan jong ki kynhun bei tyngka, ki nongiarap, ki nongai teknoloji bad ki nongthaw polisi, ka jingpeit jong ki ia ka teknoloji ba thymmai bad ka jingsaindur thymmai ka la iarap ia ka jingpur jong ki sha kylleng ka pyrthei.
Ha ka por jong ka khlamCOVID-19, ki startup ki la don ka bynta kaba khraw ha ka jingwanrah ia ka jingsaindur thymmai bad ka jingpdiang ia ki kam ba thymmaikatkum ki jingdawa kiba mih wutwut da kaba sdang ia ki jingshakri ba thymmai ha ki kam ka koit ka khiah, ka jingpynpoi mar bam khlem da hap iakynduh briew bad ki lad ban trei bad ioh jingnang jingstad na ki jaka bapher bapher.
Ki kam startup ka India ki la kiew bha na kumba 400 tylli ki startup kiba la kyntiew kyrteng ha u 2014 sha kumba 85,000 tylli ki startup kiba la pynrung kyrteng bad palat 100 tylli ki unicorn kiba kot lang baroh sha kumba $350 billion.
Ka India ka don ha ka kyrdan kaba lai ha ka pyrthei ha kaba iadei bad ka jingdon ki unicorn bad kan long sa tang katto katne por ba kan poi sha ka kyrdan kaba nyngkong. Katkum ka jingwadbniah ka Nasscom.
Ka India ka la ioh palat 1,300 tylli ki kynhun treikam teknoloji ha une u snem ba la dep bad kane ka la kyntiew ia ka jingdon ki teknoloji startup sha kumba 25,000 haduh 27,000. Shuh shuh, ka ri ka la ioh palat 23 tylli ki unicorn ha ka CY2022, kaba la kyntiew kyrdan ia ka sha kaba ar ha kane ka pyrthei.
Ka jingiar jong ki kam startup jong ka India ka dei ruh namar ki sienjam ka Sorkar kiba la saindur ban pynshlur ia ka jingseng kam lajong ha ka ri. Ha u snem 2016, la sdang ia ka Startup India programme kaba ai jingiarap ia ki kompanistartup ha kaba iadei bad ki khajna, ka jingpynshisha da lade, ba ka jingpynstet ha ki kam pan patent.
Kiwei kiwei ki sienjam kum ka Atal Innovation Mission bad Digital India, ki peit bniah ia ka jingkyntiew ia ka jingsaindur thymmai bad ka jingwanrah ia ki jingdon jingem kiba iadei bad ki kam digital bad ka jinglong jingman kaba plie lad ia ki kam startup.
Ka rynsan jong ki incubation centre bad ki jingpynstet kam, ka jingtyrwa jaka iatrei lang, ki lad sha ki nongbei tyngka bad ki lad networking ki dei kiba la seng ban plie lad sha ki jingdonkam bad ki jingialam lynti. Namar kine ki sienjam, ka India ka la kylla sha kawei na ki jaka ba khlain tam ki kam startup bad ka la khring ia ki jingmut jingpyrkhat bad ki jingbei tyngka na kylleng ka pyrthei.
Ka jingkiew ka India sha ka kyrdan kaba 41 ha ka Global Innovation Index ha kine ki hynniew snem ba la dei ka dei namar ki jingpyrshang bym ju kut jong ka sorkar bad kane ka pyni ia ka jingdonkam jong ka jingsaindur thymmai kaba long ruh ka bynta kaba kongsan ia ki startup. Ki kam startup ka India ki la ioh jingmyntoi na ka jingkiew ki nongbei tyngka bad ki nongkyrshan bad ruh ka jingiatreilang hapdeng ki startup, ki kompani bad ki skul bah.
Naduh mynshuwa, ki kam startup ka India ki dei kiba iasoh bad ki nongbahtier 1 kum ka Mumbai, Bengaluru, Hyderabad bad Delhi.Hynrei ki kam startup mynta ki la sdang kiew ha ka thain shateilammihngi.Namar ki polisi bad ki sienjam jong ka Sorkar, ka jingdon ki startup ha ka thain shateilammihngi ka la kiew shibun shah.
Ki kam startup ha ka thain shateilammihngi ki kynthup ia kumba 900 tylli ki startup ba la ithuh da ka DPIIT kiba la plie lad ioh kam haduh 8,800 tylli ha kaba 42% na kine ki startup ki dei kiba don kumnokumno kawei ka longkmie kum ka director.
Ka Northeast Entrepreneurship Fellowship ka dei kaba la seng ban kyntiew ia ki kam startup. Ka dei ka prokram kaba kyrpang kaba pyniasoh, wanrah jingiatreilang bad ai jinghikai ia ki nongseng kam na ka thain shateilammihngi.
Naduh ba la sdang ia ka Startup India kum ka rynsan ha kylleng ka ri, ka jingdon ki startup ha ka thain shateilammihngi ka la kiew bad ha u Naiwieng 2022, ka Startup India ka la pynlong ia ki workshop ASCEND (Accelerating Startup Calibre & Entrepreneurial Drive) ha ki jylla ka thain shateilammihngi.
Ka North-eastern Council, bad ka B-School Incubator IIM Calcutta Innovation Park, ka la sdang ia ka North-East Entrepreneurship Development Programme (NEEDP) kaba nyngkong ha ka NEC Secretariat haNongrim Hills, Shillong.
Kane ka sienjam, kaba prad lynti thymmai, kan ai jingmyntoi ia ki briew na baroh 8 tylli ki jylla ka thain namar ka thmu ban lap bad pynkup bor ia 270 ngut ki nongseng kam ba tbit na ka thain lyngba ki prokram ba kyrpang.
Ka Northeast Venture Fund (NEVF) kaba la seng ha ka jingiatreilang bad ka North-eastern Development Finance Corporation Ltd (NEDFi) ka thmu ban aibor ia ki kompani na ka thain da kaba pynbiang pisa kaba ki donkam ban kiewshaphrang bad khring ia ka jingbei tyngka nabar.
Ka jingsengia ki jaka pule kiba bha kum ka IIM bad NIFT kin iarap ban pynskhem ia ka thain kum ka tyllong bad ka jaka ioh jinghikai. Ka Meghalaya Institute of Entrepreneurship ka dei sa kawei ka kynhun sorkar kaba peit kyrpang ia ka jingkyntiew ia ki kam shimet bad ka jingpyntbit ia ki briew ka jylla.
Ka thain shateilammihngi jong ka ri India ka don shibun ki lad na ka bynta ka jingbei tyngka, ki kam khaii bad ki startup. Ban pynbiang ia ki kam startup kiba khlain, ka long kaba donkam ban pynbiang ki jingdon jingem, ka jingialam lynti bad ka jingkyrshan ba ki nongsaindur thymmai ki donkam na ki incubator, ki nongkyrshan bad ki riewshemphang bad ka Sorkar India ka la shim katto katne ki sienjam na ka bynta kane.
Ka la kylla sha ka jaka kaba khringia ki nongseng kam lajong namar ka jingbha ki lad ka leit ka wan bad ka jingiasoh ha kine ki snem ba la dep bad ruh ki kam synshar kiba skhem. Ki samla bad ki nongseng kam lajong ki la sdang tuid sha kane ka thain ban peit ia ki lad ki lynti da kaba pyndonkam ia ki polisi jong ka sorkar kiba ai jingkyrshan. Katba ka India ka dang ktik ia ki jingmut jingpyrkhat jong ka pyrthei, ka la dei ka por ban plie ia ki lad kiba don ha ka thain shatei lam mihngi.
