Shillong, Jymmang 19: U Dr Mithu Baidya u ba dei u Project scientist, IIT Kanpur bad u ba dei ruh na kane ka nongbah Shillong haba kren ha ka jingiakynduh lang ki stad wad bniah halorki dwai kynbat ha “MEBAAI Tribal Health bad Wellness Center” ha Shillong u la ong ba ki Khasi kila don ha kine ki jaka 10,000 snem mynshuwa bad kiba la rim tam.
U Dr Mithu, u la ong ba dei kane kaba la pynlong ba kane ka jingsumar ai dawai kynbat ka dang iai neh iasah ha kine ki lum khasi bad u la kdew ruh ba ka North Eastern Hill University kala pynlong ruh ia ka jingwad bniah ka jingdon ki kynbat dawai ha kane ka jylla Meghalaya bad kala dep ban jurip haduh 54 jaid ki dawai kynbat.
Kane ka jingiamir jingmut jong ki scientist ha kaba ia dei bad ki dawai kynbat kala long haka 10 tarik mynta u bnai ha Shillong, ha kaba bun ki stad wad bniah na kylleng ka bynta jong ka Ri India kila wan ban ia shim bynta kyntup ia kiba na kane ka jylla Meghalaya bad haba pynkut ia kane ka jingiamir jingmut la don lang ruh u Lat jong ka jylla u Tathagata Roy u ba la pynsngew ia kaei kaba u don ban ong halor kane ka jingsumar dawai kynbat.
