Shillong, Rymphang 12: U Myntri kam poh iing jong ka sorkar jylla u Bah Lahkmen Rymbui mynta ka sngi u la ong ba ki khynnah kila sdang long ia ki eksamin jong ki kumta ki seng bhalang kim dei ban pynlong ia ki jingiakhih.
Haba kren ha ki lat pathai khubor mynta ka sngi u myntri kam poh iing u la ong ba u ai khublei ia u myntri rangbah ka jylla u ba la ibit ban aiti ha u ia ka tnad kam poh iing. U la ong ba kane kam dei kaba thymmai hynrei ka dei tang ka jingkitkhlieh.
U bah Lahkmen u la ong ba kaei kaba u kwah ban iohi ba ki paidbah ki dei ban ioh ia ka jingshong suk shnongsain, ha khappud kan don ka jingiatreilang ha pdeng ki BSF bad ki pulit ka jylla ban teh lakam ia ki kam sniew bad ban peit ba ki pulit kin ioh ia ka jingshaniah jong ki briew.
Haba jubab ha kaba ia dei bad ka kam ILP, na ka liang jong u myntri kam poh iing u la ong bad a sngewnguh shisha ia ki paidbah, ia ka sorkar bad baroh ki MLA jong ka jylla kiba la ia shnoh kti lang ban dawa ia ka ILP.
Haba ia dei bad ka jingiakhih jong ka COMSO, u myntri kam poh iing u la ong ba baroh ki seng bhalang,ki riew paidbah ki lah ban pynkynmaw ia ka sorkar haba ki don kino kino ki jingdawa hynrei kam dei pat ban ktah ia ka suk ka sain.
Na ka liang jong u myntri u la ong ruh ba yn nym lah ban trei marwei khlem da don ka jingiatreilang bad ki paidbah, ha ka juh ka por u la ong ba ia ka ain ym dei ban shim ha kti la jong.
