New Delhi, Naiwieng 25: Ha ka jubab sha ka jingkylli ha Rajya Sabha mynta ka sngi u Myntri khynnah ba dei khmih ia ka Shipping, Chemicals bad Fertilizers, u Mansukh Mandaviya u la ong ba ka “Protocol on Inland Water Transit and Trade” ka don hapdeng ka India bad Bangladesh naduh u snem 1972.
Hapoh kane ka protocol, ki lieng kiba rit jong kawei ka ri ki lah ban siew ban pyndonkam ia ki katto katne ki wah jong kawei pat ka ri. Ki don ki lynti um ba la mang kyrpang bad ki katto katne ki kad (Port) ha manla ki ri na ka bynta ka khaii ka pateng lyngba ka Inland Water Transport (IWT).
Kane ka protocol kan treikam haduh 5 tarik Jylliew, 2020 ryngkat bad ka don ruh ka kyndon pynthymmai hadien 5 snem. La pyniasoh ia ki jylla ka thain shatei lammihngi bad ka rithor lyngba ki lynti um (Inland waterways) jong ka Brahmaputra (NW-2) bad Barak (NW-16) bad Ganga-Bhagirathi-Hoogly river system (NW-1) lyngba ka Sunderbans (NW-97) lyngba ka lynti Indo-Bangladesh Protocol (IBP).
Ban pynkhlain ia ka jingiaid lynti kaba baroh shi snem ha ka lynti jong ka Indo-Bangladesh Protocol, u Mandaviya u la pyntip ruh ha ka iing dorbar thawain ba la iasoi ia ka Memorandum of Understanding (MoU) hapdeng ka India bad Bangladesh ha ka 8 tarik Iaiong, ,2017 na ka bynta ka jingkyntiew ia ka lynti Sirajganj-Daikhowa jong ka wah Jamuna bad ka lynti Ashuganj-Zakiganj jong ka wah Kushiyara ha Bangladesh. Ka jinglut kaba la antad ha kane ka projek kalong T. 305.84 klur ha ka jingbah khlieh kaba 80:20 hapdeng ka India bad Bangladesh.
U Mandaviya, shuh shuh u la batai ba hapoh ka jingiateh ha ka MoU bad ka Standard Operating Procedure (SOP), ka Bangladesh ka la ai jingbit ban pyndonkam ia ki kad jong ka ha Chattogram bad Mongla na ka bynta ka kit ka bah ia ki mar jong ngi lyngba ki lynti um, lynti rel, ki surok lane multi-modal transport hapoh u pud u sam jong ka.
Ki don phra tylli ki lynti ba la ai hapoh ka jingiateh ka ban pynlah ia ka thain shatei lammihngi ban rung ban mih lyngba Bangladesh. Kine ki lynti ba la ithuh kin ailad ban rung ban mih sha Agartala bad Srimantpur ha Tripura, Dawki ha Meghalaya bad Sutarkandi ha Assam, bad kumta da kine ki lynti kan long ka jingmyntoi kaba khraw ha ka ioh ka kot jong ka thain shatei, la pynkut u myntri.
