Jowai, Nailar 25: Ka Jaintia hills Autonomous District Council (JHADC) kala ia kynduh jingeh ha kaba ban siew ia ka tulop jong ki 1300 ngut ki nongtrei kam lah shuh bad kum juh ia ki MDC baroh 30 ngut.
Katkum ka jingtip kaba la ioh na ka ophis jong ka JHADC la ong ba ki MDC kim shym la ioh tulop mynta la shiphew bnai sa ban iaid khatwei bnai, katba ki nongtrei pat ki khlem ioh tulop mynta la khyndai bnai bad kane kala buh ia ka jingeh ia ki iing ki sem kiba trei ha JHADC.
Ki lad khubor ki iathuh ba na ka liang jong u CEM jong ka JHADC u Bah Thombor Shiwat ba bat ruh ia ka tnad pla pisa jong ka Council, u la pyrshang ban ia kynduh ia u Myntri Rangbah ka jylla u Conrad K Sangma ban kyrpad ia ka sorkar ba kan pynlait lem ia ka bhah kaba dang sah ban ioh siew ia ka tulop ki nongtrei.
Ha ka dorbar mang tyngka kaba la dep, u bah Andrew Shullai MDC u la kylli katno ka bhah kaba ka JHADC ka dang dei ban ioh na ka sorkar na ka liang jong u CEM u la pyntip ba ka bhah kaba dei na ki marpoh khydnew ka Council ka dang dei ban ioh ka long kumba T.100 klur.
