Shillong, Rymphang 5: Ki ophis jong ki Municipal kiba don ha ka jylla Meghalaya ryngkat ka Meghalaya Urban Development Agency (MUDA) kila sdang ia ka jingpynshai sha kiba die madan ba ki lah ban ioh ia ka ram na ki bank kaba haduh T.10,000/- tynghka ban iarap bai seng ia ki.
U bah BRM Lyngdoh Director jong ka MUDA, haba kren ha u SP News Agency u la ong ba kane ka jingiarap kan dang iaid sha khmat, ka jingialang kaba la pynlong haka sngi balang ha State Central Library ka long tang ka jingsdang ban pynshai sha ki nongdie madan.
Namar kane ka dei ka ram kaba ka sorkar kan ai sha ki nongdie madan, ka shnong ha ki nongdie madan la ki sngew don kam ne em ban shim ia kane ka ram, lada ki don kam ka ophis jong ki Municipal kiba don ha ka jylla ryngkat ka ophis jong ka MUDA ki long kiba kloi ban iarap ia ki haba ki don kam.
Kane ka skhim ban airap ai ram ia ki nongdei madan ka long na ka bynta baroh kito ki jaka ba don ia ka Municipal, kum ka Shillong, Jowai, Resubelpara, Baghmara, Willamnagar bad Tura. Na ka bynta ka nongbah Shillong lada don ki nongdie madan kiba kwah ban shim ia kane ka ram ki lah ban ioh ia ki phom na ophis, Raitong Buidling.
U bah Lyngdoh u la pynshai ruh ba ki nongdie madan ki lah ban leit sha ki Cyber ban phah pyndap lem ia ka application jong ki lada ki lah ban leh, hynrei lada ki kwah ban shim da ki phom ruh ki don ha ophis kiba lah ban leit shim ha Raitong Building haduh kane ka sngi thohding ban wan.
Haba ia dei bad kane ka jingiarap namar ka dei ka ram kam shym don kata ka jingbuh thong katno ngut, hynrei kan long ia baroh kito kiba shong die madan bad ha ka juh ka por ruh ka shnong ha ki Bank ha dien ba kila dep ban bishar bniah ia ki kot ki sla.
