Shillong, Risaw 03: Mynta ka sngi ka kynhun ki seng bhalang jong ka dong shatei lam mih ngi jogn ka Ri India hapoh jong ka lama North East Forum of Indigenous People’s (NEFIP) kala pynlong ia ki jingiakhih ha Assam, Meghalaya, Arunachal Pradesh, Tripura, Nagaland bad Manipur ban pyrshah ia ka jingthmu jong ka sorkar pdeng ban wanrah biang ia ka Citizenship Amendment Bill (CAB) ha kane ka dorbar tlang jong ka parliament.
Ha Shillong, ka CoMSO ka dei ka dkhot jong ka NEFIP kila pynlong ia ka jingiakhih da kaba shong kyllain mungor ha jan additional secretariat ha kaba ki dkhot jong ki seng bapher bapher na kylleng ka jylla kila wan ban ia shim bynta ha kane ka jingiakhih ban pynpaw ia ka jingpyrshah ha kaba ia dei bad ka jingthmu jong ka sorkar pdeng ban pyntrei kam ia ka CAB.
Haba kren ha ki lad pathai khubor u bah Robertjune Kharjahrin general secretary jong ka NEFIP haba kren ha ki lad pathai khubor u la ong ba kane ka long tang kum ka jingsdang jong ka jingiakhih ha ka dong shatei lam mih ngi jong ka Ri India bad lada ka sorkar pdeng kam weng ia ka CAB ka jingiakhih kan dang iai betengshuh.
Une u nongialam jong ka NEFIP u la ong ba lada ka sorkar India ka sengew ba kito ki rit paidbah ki shah ban bein ha ka Ri Pakistan bad ha Bangladesh balei kam ai ia ka jingujor sha ka United Nation, ha ka jaka ba kan ujor sha ka UN ka kwah ban wanrah ia kane CAB ban pynkylla nong India ia kine ki briew.
Une u nongialam jong ka NEFIP u la ong ba ka daw jong ka jingbymnud jong ka sorkar India ban ujor sha United Nation, leh se namar ha India ka don ka jinglehbein na ka RSS da ka jingthmu ban pynkylla Hindutva ia ka Ri India.
U Bah Robertjune u la ong ba lada ka CAB kan urlong kan long ka khlam na ka bynta ki paid riewlum jong ka dong shatei lam mih ngi jong ka Ri India ha kaba kin sa shah tyllep ha kiwei ki jaidbynriew heh paid kane ka long ka jingma ia ka dong shatei lam mih ngi.
Haba kren halor ka jingkam jong u Amit Shah myntri kam poh iing jong ka Ri ha kaba u la ong ba ka CAB kan nym ktah ia ka Article 271 ter ter bad ia ka Sixth Schedule, u Bah Robert u la ong ba kane ka long kaba dei, hynrei ynda la bun da kiwei ki jaidbynriew bad kin ioh ban bat ia ka bor synshar ia ki ain kiba la don lah ban pynkylla. Dei na kane ka daw ba ki pyrshah ia ka CAB.
U General Secretary jong ka NEFIP u la kyntu ia u myntri rangbah ka jylla Meghalaya u Conrad K Sangma ba un ialam na khmat ban ieng pyrshah ia ka CAB kumba u la leh ha ka snem ba la dep, ha ka juh ka por la kyntu ia ki myntri rangbah jong ka dong shatei lam mih ngi jong ka Ri India ba kin ieng ban pyrshah ia ka CAB.
Bah Robertjune u la iathuh ba hapoh ka jylla Mizoram kim shym la lah ban pynlong mynta ka sngi na ka daw jong ka jingleit jong u myntri kam poh iing jong ka sorkar pdeng u Amit Shah ha katei ka jylla, ia kane ka jingiakhih kin sa pynlong ha ka 5 tarik mynta u bnai.
