Shillong,Naiwieng 07: Ki nonghikai kiba hikai ha ka kyrdan elementary klas I haduh klas VIII ki ba ialeh ia ka professional training course ka Diploma in Elementary Education jong ka 1st batch 2013 ba la pyniaid da ka National Institute of Open Schooling kiba la bei pisa da ka Sorkar Jylla lyngba ka Scheme SSA kiba kynthup naduh ki nonghikai Govt, SSA, Deficit bad Adhoc hapoh ka Jylla ki la rai ban ym leit thoh ia ka D.El.Ed exams na ka bynta ki 1st batch ka ban sdang naduh 9 tarik haduh 21 tarik mynta u bnai.
Ha ka sngi sdang jong ka eksam D.EL Ed kin pynlong ia ka jingiakhih da kaba shong kyllain mungor ha ryngkat bad ki lama iong ha ka 9 tarik mynta u bnai kaba dei ruh ka sngi ba sdang jong ka D.EL.ED exams ha Additional Secretariat Parking Lot Shillong naduh ka por 11 baje mynstep haduh 1:30 noh phai sngi.
Ia kane ka rai la shim ha ka jingialang ba la pynlong da ka Meghalaya SSA Schools Association (MSSASA) Central Body ha ka 4 tarik mynta u bnai ha Tpep Pale Community Hall Jowai bad hapoh Khasi National Dorbar Hall Mawkhar, Shillong hadien ba ka Sorkar Jylla bad ki bor ba ka khliehduh jong ka NIOS kim lah ban pynurlong ia ki jingdawa jong ki nonghikai kiba ialeh ia ka D.El.Ed training jong ka 1st batch.
U Bah H.M.Marbaniang General Secretary ka MSSASA – Central Body ha u kyrwoh ba la phah sha ki lad pathai khubor mynta ka sngi u la ong ba hadien ba ka Synjuk ka la lap biang ia ki jingbymbiang jong ka result jong exam D.El.Ed jong ki 1st batch ba la pynmih da ka NIOS ha ka 22 tarik Jylliew mynta u snem kaba dei ruh ka sien kaba lai ba la pynmih ia ka result hadien ka jingmih shibun ki kynrum kynram ha ka result ba la pynmih da ka NIOS ha ka 9 tarik Nailur bad 4 tarik Naiwieng 2016.
Na ka liang jong ka ka Synjuk ha ka 4 tarik u Risaw ka la leit buh jingthoh sha ka Sorkar Jylla lyngba u Director ka DERT u T.G.Momin bad kyrpad ia ka Sorkar Jylla ba kan tuklar bad ia pynbeit bad ki bor ba dei peit jong ka NIOS ba kin pynbeit biang mar mar ia ki jingbakla baroh bad ban pynmih biang ia ka result hapoh 31 tarik u Risaw mynta u snem hynrei kaba lyngngoh ka long ba ka Sorkar Jylla bad ki bor ba dei peit ka NIOS ki shu sngap jar jar.
Kumta ka synjuk ka kyrpad ia baroh ki D.El.Ed Trainees jong ka 1st batch 2013 ba kin iapoi biang por ha ryngkat bad ki lama iong kumba la iarai lang ha ka jingialang ha katei ka sngi. La ong u Bah H M Marbaniang General Secretary jong ka MSSASA seng kmie.
