Shillong, Nohprah 07: Ka seng KSU mynta ka sngi kala rakhe ia ka sngiiap ba 24 snem jong u president ka seng bala khlad noh u Bah Bull N Lyngdoh da kababuh syntiew ha u mawmot jong u ha Malki ha kaba da ki spah ngut ki dkhot jong ka seng kila ia don lang ha kane ka sngi.
Ha kane ka sngi ban kynmaw burom ia ka sngi iap ba 24 snem jong u nongialam ka seng, u mytnri ka tnad pynroi sor u bah Hamletson Dohling u ba dei ruh u general secretary ba rim jong ka seng haba kren kum u kongsan u la ong ba ki nongialam jong ka seng KSU ki leit bad ki wan hynrei ka seng ka neh kan sah bad ka dei ruh ban dang iai pynkhlain na ka por sha ka por.
Haba kren ha kane ka jingialang, u Bah Dohling u la ong ba balei la hap ban kynmaw burom ia une u nongialam ka seng, ka daw ka long ba une u nongialam u ba leh da ka kam. Yn nym lah ban niew tang ia ki kam kiba u la leh bad kane ka jingialang ki long ban tip u ei u Bah Bull.
U bah Dohling u la ong ba ngim don kam ia ki khla ha ki kot khubor hynrei ngi don kam ia ki nongialam kiba pyni da ka kam, ka mynsiem kaba u bah Bull u la pynrung ka long ban leh da ki kam, kam myntoi ban shu ia heh nia hynrei kaba don kam ka long da ki kam bad halor kane ka nongrim jong ka KSU ka dang neh.
Ha kane jingialang u Bah Dohling u la ong ba ka jaidbynriew ka dang don bun bah ki kam kiba dang sah, la ka long ha ka kam pud kam sam bad kiwei kiwei. U la ong ba ka jinglong myntri jong u um dei na ka bynta jong u shimet hynrei na ka bynta jong ki paidbah. U la ong ba don kam ban ioh ia ka pulit station kaba pura ha Langpih.
U Bah Hamlet u la ong ba ka mat kaba kongsan tam ka long ba ka sorkar kan leh na ka bynta ban shna ia ki khyndop ban peit ia ka rung ka mih jong ki briew bad ia kane kin sdang shuwa ha Ri Bhoi District ban ia da na ka jingwan rung ki briew na sha bar namar kum ka jaidbynriew ka dei ka jaidbynriew rit paid ka sorkar kala shim khia ia kane.
Ki nongialam jong ka KSU kiba la ia don lang ha kane ka sngi ki long u Samla Donal Thabha general secretarty jong ka seng bad kiwei kiwei ki nongialam jong ka seng kmie bad na ki shnat bapher bapher. Ha kane ka sngi la pynlong ruh ia ka jingiakynjat boll ha ka kyrteng jong ka nam bad ka burom jong u president ka seng bam kwai ha dwar u blei u bah Bull N Lyngdoh.
