Shillong, Jymmang 10: U Bah George B Lyngdoh MLA jong ka Umroi haba kren ha ka jingpynkup burom kaba la pynlong da ka seng Meghalaya Editors bad Publisher Association (MEPA) mynta ka sngi ha Khasi National Dorbar Hall, u la ong ba ki nongkyndong ha kane ka jylla ki dang shem shitom ban tip iaki skhim jong ka sorkar.
Ha ka jingkren ka jong u la ong ba ki paidbah mynta kila sdang ban duh jingshaniah iaka sorkar, ki iing bishar namar ki shim por da ki snem, wat ia ki nongmih khmat ruh, ka daw ka long ba ia ki jingeh jong ki paidbah ym don ba sngap lem namar ba ki paidbah nongkyndong kim tip ia kaei kaba ka sorkar ka leh.
Dei ha kane ka nongrim ba haduh mynta ki don ki briew kiba shim kabu ia skhim jong ka sorkar bad wat ia ka skhim NERGS ruh ia kaba ka ain kam shah. U la ong ba ha kane ka juk kaba ki lad pathai khubor kila kylla, ki paidbah ki ioh ia ki khubor nalor ki kot khubor, ki ioh ia ki khubor lyngba ki TV bad lyngba ki online news ha kane ka juk jong ka Internet. Na ka liang jong u tei u MLA u la kyntu ia ki nongthoh khubor ba ka jignthoh khubor kam dei ban long kaba la noh shiliang eh ha kaba ki nongpue ki ngiah noh ban pule.
Ha kane ka sngi ka MEPA kala pynkup burom ia u Bah George u ba long u wei na ki dkhot jong ka seng la bun bun snem bad u long u ba la trei shitom na ka bynta ka jingkiew jong ka MEPA. Ki dkhot jong ka MEPA kiba la poi sha ka kyrdan MLA ki long u Dr DD Lapang, Bah EK Mawlong, u Manas Choudhury bad mynta u bah George B Lyngdoh na ka liang jong ka MEPA ka sngew kmen ban iohi ba ki nongkit kam jong ka seng kin poi sha kane ka kyrdan.
Ia kane ka jingpynkup burom ia u Bah George B Lyngdoh la pyniaid da u Dr K.K Jhunjhunwala trai jong ka Magazine Eastern Panorama, kiwei kiba la kren ha kane ka sngi ki u Bah MM Thaiang, Editor jong ka kotkhubor yutip, Bah Starfing Pdahkasiej trai bad Editor jong ka SP News Agency, u Bah John Thabah Editor jong ka Highland Post, Bah R M Shabong trai bad Editor jong ka khubor Rupang, u Bah S S Syiem Executive editor jong ka Peitngor bad ia ka jingkren ai khublei la kren da u Bah DL Siangshai Editor jong ka Mawphor.
