Shillong, Lber 14: U Chairperson jong ka Meghalaya Human Rights Commission, u Dr Justice Aftab H Saikia u la ia shimbynta ha ka jingialang kaba la pynlong ha Don Bosco Youth Centre, ka phang pdeng jong kane ka jingiakren ka long ka jingiaryngkat dor hapdeng ki kynthei bad shynrang bad ka jingbym nohliang. Ia ka jingialang la khot da ka “National Institute of Fashion Technology”, Shillong da ka jingiatreilang bad ka Meghalaya Human Rights Commission (MHRC), jong ka sorkar Meghalaya.
Haba kren ha kane ka jngialang kum u kongsan na ka liang jong u Dr Justice Aftab H Saikia, u la ong ba baroh ki nongshong shnong jong ka Ri India ki dei ban tip ia ka Riti Synsahr jong ka Ri. U la kren bynniaw ba 92% na ki nongshnong jong ka Ri India kim pat iohi ia ka Constitution bad u la ong ba ia kane ka kot dei ban sam ei sha ki paidbah nongshnong jong ka Ri, la ong ba ia ka hok long briew, kiba ia dei bad ka hok jong ka jingialang marryngkat, ka jinglaitluid, ka hok ban ia burom markylliang la don hapoh jong ka Riti Synsahr jong ka Ri ban iada.
Naka liangjongu Dr Saikia u la kyntu ia kiba ia don ha kane ka jingialang ba kin pynshlur ban wanrah ia ka jingiasngew shipara badban ieng pyrshah ia ka jingniew bein para briew. Ha kane ka juh ka sngi na ka liang jong u Dr Saikia u la plie paidbah ia ka website jong MHRC ha ophis jong ka Commission ha ophis rimjong ka old Arunachal Pradesh Secretariat Building, Shillong Cantonment.
Kiwei kiba la kren ha kane ka jingialang ki long u P J P Hanaman, dkhot jong ka MHRC, u ba la batai ia ka jingmut jong ka MHRC bad ka kong C Lyngwa, Commandant, 1st Bn MLP, kala kren halor ka phang kaba ia dei bad ki pulit halor ki kam thombor ia ki kynthei, u bah W Diengdoh u la kren ia ka bynta jong ka iing bishar bad ka kong A Kharwanlang na Grassroots kala kren ia ka bynta jong ki seng bhalang ha kaba ia dei bad ka hok long briew man briew.
Ia kane ka jingialang la kren plied a u Secretary jong ka MHRC, u bah A Mawlong, ha ka jingkren ka jong u la ong ba ka sorkar kan sa buh ia ka iing bishar ban peit ia ka long briew man briew ha baroh ki District khnang ba ia ki mutkot duma dei ban pyndep hapoh jong ki Distict.
