Shillong, Kyllalyngkot 18: Ha dien ba la pynbna iaka elekshon sha ka iing dorbar thawain ka jylla da ka Election Commission jong ka Ri India, u Chief Electoral Officer ka jylla u bah F R Kharkongor u la pyntip ba ki nongthep ha kane ka jylla mynta ki don 21,61,129 ngut baroh.
Ka jingdon ki nongthep vote kham bun ki kynthei ban ia ki shynrang, na ki 21,61,129 ngut, ki kynthei ki don 10,92,396 ngut, ki shynrang ki don 10, 68, 801 ngut, ki ban ioh thep vote nyngkong ki don 81,443 ngut, kiba don jingduna dkhot met ki don 7478 ngut, kiba la palat iaka 80 snem ki don 22,658 ngut, kiba la shispah snem shaneng ki don 290 ngut.
Ka jingdon ki jaka thep vote ha ka jylla baroh ki don 3483 tylli, u bah Kharkongor la ong ba kin ialeh ban pynbiang ia ki jingdonkam ha ki jaka thep vote kumba ka long ba u Chief Election Commissioner jong ka Ri India habaroh 60 tylli ki konstitensi ha ka jylla baroh kawei.
La iathuh ba kin ailat ban vote na iing na ka bynta kiba la rangbah bad kiba don jingduna na ki dkhot met da kaba ailat ba kin pyndon ia ka phom 12D ha kaba ki lah banthep vote yn sdang ban shah ban thep vote san sngi ha dien ba la dep ban thep nomination bad ki don ki kynhun kiba la thaw kyrpang.
