Shillong, Risaw 25: Ki nongialam shong na U pper Shillong hapoh ka kynhun Synjuk ki Nongsynshar Shnong (SKNS), mynta ka sngi kila leit ban ia kynduh ia u myntri kam pynroi sor u Bah R V Lyngdoh ban pan ia ka jingpynshai halor ka jingtam pud jong ka MUDA sha bar jong ka Shillong Municipal Board.
Ha dien ka jingiakynduh ia u myntri ka tnad pynroi sor u Bah Gilbert G. Laloo, General Secretary ka SKNS, u la ong ba kila pan ka jingpynshai na u myntri ha kaba ia dei bad ka jingtam pud ka MUDA sha ki jaka bym dei jong ka SMB bad ka jingyntreikam ia ka Meghalaya Building Bye-Law 2011.”
Ha kane ka jingiakynduh na ka liang jong u myntri u la ong ba wat la ka Upper Shillong kam hap hapoh jong ka SMB, hynrei la pynhap pat ha ka Master Plan bad kane ka jingthmu ka long ban peit ia ka rukom shna iing shna sem ba lada don ka jingpynjulor ka mariang kan nym ktah ia ki paidbah.
Haba ia dei bad ka jingshna ia ki iing tnum ki trai kim don kam ban shim ia ka jingbit na ka MUDA, ki hap ban shim tang lada ki shna ia ki iing dewbilat. Haba ia dei bad ka jingoh dor jong ka MUDA ban ioh ia ka certificate ba ki la lap ban let shong, u myntri u la ong ba ki don ki ain tang ba ki ophisar kim bud ia ki.
Haba ia dei bad ka jingkhatei ia ka cess kaba shipercent, la ong ba ia kane hap ban siew u kontraktor ha ki jaka ba hap hapoh jong ka SMB, hynrei ia kiba lait na ka SMB ym hap ban siew bad lada ki don ki ophisar kiba shim pisa yn pynshitom ia ki.
U myntri u la kren shai kdar ba ka MUDA kam shym la tam pud sha ki jaka ba long sha bar jong ka SMB, hynrei ka dei ka kam jong ka KHADC ban shna ia ki rule ha kaba ia dei bad ka rukom shna iing shna sem.
Ka synjuk ka pdiang sngewbha ia ka jingkwah jong ka tnad pynroi ban buh ia ka kynhun trei kam kaba kyrpang ban peit ia kito ki jaka ba hap sha bar jong ka MUDA.
