Shillong, Nailur 17: U Chief executive Member jong ka KHADC u Bah Teinwell Dkhar u la iathuh ba mynta ka sngi kila don ar ngut ki ophisar na ka sorkar pdeng kiba la wan ban ia kynduh bad ia kren ia ka rukom trei kam jong ki District Council.
Kine ki ar ngut ki ophisar ki long ka Annu na ka Ministry Panchayat Raj bad u Pratap na ka Ministry Rural Development. Kane ka jingwan jong ki ka long ba ki wan ban kylli ia ka jingtrei kam jong ki District Council ha kane ka jylla bad ha kane ka jingiakynduh la don lang u Chairman jong ka KHADC u bah PN Syiem bad ki EC jong ka Council.
U Bah PN Syiem u la ong ba ha kane ka jingiakynduh kila wan ban kylli ia ka jingtrei kam jong ki iing bishar, ka jingtrei kam jong ka Council bad kiwei kiwei ki kam pynroi sha ki nongkyndong kane ka long kaba ki ia kren bad kine ki Assistant Secretary jong ka sorkar pdeng.
Haba la kylli hato ka don ne em ka jingiakren halor ka jingpyntrei kam ka sorkar pdeng lyngba jong ki blok ia ka skhim “My Village My Plan” la ong ba ia kane kim shym ia kren ei ei bad na ka liang jong u CEM u la ong bay m don jingtip ba kan don kum katta.
