Shillong, Naiwieng 27: Mynta ka sngi ka Meghalaya Pradesh Congress Committee (MPCC) kala rakhe ia ka jingdap 50 snem ka thma ba pynlait luid ia ka ri Bangladesh ha u snem 1971 ia kaba la rakhe mynta ka ka sngi ha Congress Bhavan Shillong.
Haba kren ha kane ka jingialang u Captain Praveen Davar la ong ba dei ka jingtrei shitom ki shipai ba shlur jong ka Ri India kaba la lah ban pynkha ia ka ri Bangladesh bad kane ka long da ka jingiohi jngai ka myntri rangbah duh ka Ri India ka Indira Gandhi bam kwai ha dwar u blei.
Ha kane ka jingialeh thma pyrshah ia ka Pakistan na ka Ri India la lam khmat da u Field Marshal u Sam Manekshaw bad ar ngut ki shipai duriaw u Air Force Admiral S.M Nadna bad u Air Chief Marshal P.C Lal.
Ha kane ka jingialang u Captain Praveen u la ong ba ha u Naiwieng 1971, ki poiwir na East Pakistan, mynta ka Bangladesh kila wan sha India haduh 10 million ngut ki briew, ka Myntri Rangbah duh ka Ri India ka Indira ha kato ka por, wat la ka tip ba ka America bad ka China kin pyneh hynrei ka Ri India kala shim ia ka rai ban pynlait luid ia ka East Pakistan, mynta ka Bangladesh.
Ha kane ka sngi u Captain Praveen u la pyndon burom ia ki 4000 ngut ki shipai kiba la khlad ha kane ka jingiakhun ha ka thma Pakistan 1971,ha kane ka sngi la pynkynmaw ruh ia ka ia ka jinglah jong u myntri iada ri u Jagjwan Ram bad u myntri korbar ri u Swarrow Singh bad kiwei ki kynhun shipai kiba la aiti met bad mynsiem ha kane ka thma.
Ha kane ka jingialang la ioh ruh ia ka jingkren na ka Kong Wansuk Syiem general secretary ka MPCC, ha kane ka sngi la don lang ki nongkit kam jong ka party Congress na kylleng ban kynmaw burom ia kane ka sngi ba kyrpang.
