Shillong, Nailar 20: U Dr DRL Nonglait president jong ka seng Khasi Author’s Society (KSA) haba kren ha ka jingpynlait paidbah ia ka kot kaba la thoh da u Prof SS Majaw mynta ka sngi ia kaba la ai kyrteng “ John Bird Shadwell” ka parom histori, ha ka jingialang ha Khasi National Dorbar Hall Mawkhar u la ong ba ka polisi trei kam jong ka sorkar kiba don mynta kim iarap ban pynkhlain ia ka ktien khasi.
Haba kren ha kane ka jingialang kum u kongsan u Dr Nonglait u la ong ba kane ka sorkar kaba mynta kala pynkhreh ia ka “Education Policy” kaba thymmai kyrmen ba kan long kaba biang. Haba ia dei bad ka ktien khasi u la ong kan long kaba bha ba tbit ha kaba kren bad ka thoh ha ka ktien khasi, kan long ruh kaba bha lada lah ban tip bha pat ia kiwei ki jaid ktien jong kiwei ki jaidbynriew pat kane kan iarap shibun lada dang ban kren bad thoh.
Ha kane ka jingialang u la kyntu ia ka seng KJWA ba kan thoh sha ka sorkar ba ka dei ban pynkylla noh ia ki kot pule naduh klass A rit haduh kyrdan pule ha ki kolej sha ka ktien khasi. La ong ba mynta lada leit pule sha bar ka jylla ka long ba kawei na ki shnat pule ka long ba dei ban tip ia ka ktien jong kato ka jaka, hynrei kaba sngewsih ban iohi ba ha kane ka jylla Meghalaya haba ngi thoh shithi sha ka sorkar ha ka jaka ban thoh da ka ktien khasi la hap ban thoh da ka ktien phareng hapdeng jong ngi.
U la kren bynniaw haduh katta katta ba haduh mynta dang don kiba kynnoh ba ki khasi kim shym la don kata ka jingiakhih ban pynioh ban rung ia ka ktien khasi ha khyrngit kaba phra jong ka riti synshar jong ka Ri India, namar ka jingiakhih tang na ka KSA ruh mynta kala kot sha ka 39 snem ban ong ba kam shym don kata ka jingiakhih ka long kaba bakla shibun.
Ha kajuh ka por u la kyntu ia ki samla pule ba ki dei ban long kiba shlur ban shim ia ki jingpule kiba kham eh ym ban ia pule tang ia kiba suk, u la ong ba to long kum u snar, u ba nep na khnut bad heh ka khlieh katba dang tid u dang ngam bad ka khleih jong u ka dang heh, ha ka juh ka rukom ki jingeh kiba ia kynduh kin dang pyniar ia ka jingmut jingpyrkhat bad ha ka juh ka pork an dang jylliew ha ka jingstad.
Haba ia dei bad ka kot kaba la thoh da u Prof SS Majaw u la ong ba kane ka dei sa u wei pat u Mawjam sha ka thoh katar khasi kaba kyntiew ia ka ktien khasi. Ia ka kot la batai da u Bah AW Rani, ha kane ka juh ka sngi ka KJWA kala sam ruh ia ki khusnam shaki nongjop jong ka jingiakop thoh ese bad peotri kaba la pynlong da ka seng. Ia ka jingialang la pyniaid da u bah SS Rynjah secretary jong ka seng ha ka jingiadon lang bun ki riew rangbah.
