Shillong, Naiwieng 21: U Chief Electoral Officer (CEO) jong ka jylla Meghalaya u Bah FR Kharkongor mynta ka sngi u la iathuh ba baroh ki jaka thep vote na ka bynta ka MLA Election ha u snem 2018 baroh ki don 3082 tylli.
L aiathuh ba ha ka Election jong u snem 2013 ki jaka thep vote baroh ki don 2771 tylli hynrei na ka bynta kane ka MLA Election 2018 la pynmih thymmai sa 311 tylli ki jaka thep vote bad baroh ki long 3081 tylli.
Haba kren ha ki nongthoh khubor ha dien ka jingiakynduh ia ki seng sain pyrthei, mynta ka sngi u la iathuh ba ka thong jong ka tnad election ka kwah ban baroh ki nongthoh vote ha ka jylla kin kot sha ka 18 lak ngut lane ka dei ban tam, haduh mynta kiba la register kum ki nongthep vote ki la palat ia ka 17 lak.
Na ka liang jong ka tnad election kala ioh jingkhein ba palat ia ka 1.5 lak ngut ki samla kiba la kot sha ka 18 snem ka rta kim pat don kyrteng ha ka electoral roll bad kaba bun eh na ki 11 tylli ki District ha ka jylla ki samla kiba khlem pat rung kyrteng ha ka electoral roll ka dei ka East Khasi Hills District ka don 55025 ngut, ka West Garo Hills ka don 2899 ngut, ka South Garo Hills ka don 12129 ngut bad ka Ri Bhoi District ka don 11400 ngut.
Haba ia dei bad ki lad jingiada ha ka por elelction ban pynlong ia ka election kaba iaid beit iaid ryntih na ka liang jong ka tnad pulti ka hap ban pynkhreh bad u heh pulit u Bah BL Buam ha ka kyrdan ADG un long u peit ia kane ka kam.
Haba ia dei bad ki briew kiba shong ha khappud bad ka jylla Assam la ong ba ka jingmait kyrteng ia kiba don kyrteng ha ki ar tylli ki jylla kala iaid sha khmat, kumba ka long haduh mynta kumba 24 ngut ki briew kiba la shah mait kyrteng na Meghalaya namar ki don kyrteng ha Assam ruh.
