Shillong, Risaw 01: Mynta ka sngi ka ophis jong ka District Election jong ka East Khasi Hills District kala pynlong ia ka jingleh burom ia ki riew tynmen ha kane ka sngi burom ba kyrpang ka jong ki ha satlak ka pyrthei ha Mercy Home ha Demthring Shillong.
Haba kren ha kane ka jingialang u bah R Wahlang ADC, la ong ba ki riew tynmen ki dei shisha kita ki paia ba skhem ha ka synshar paidbah, halor kane ka nongrim ba ka Election Commission jong ka Ri India kala buh ia kane ka sngi ban burom kyrpang ia ki riew tynmen.
Kum ka jingburom ia ki riew tynmen ka ECI kala pynmih ia ka ain kaba thymmai ha kaba ki lah ban thep vote na iing bad ki long ki nongshah khot sngewbha sha ki jaka thep vote, ia kito kiba la palat 80 snem kin ioh ban thep vote na iing da kaba pyndap ia ka phom 12 D.
Kane ka long ban pynlong ia ki riew tynmen ba kin dang ia don bynta namar kila don ka jingtbit kaba kyrpang ha ka jingjlan ka rta jong ki,ha kane ka sngi la pynkup burom ia ki 80+ ngut ki riew tynmen na ki konstitwensi bapher bapher la pyndon burom ia ki.
