Shillong, Risaw 25: U myntri rangah duh jong ka Ri u Narendra Modi u la plié paidbah ia ka “ National Tribal Carnival-2016” ha nangbah Delhi mynta ka sngi, ha ka jingkren u la ong ba kane ka long ka sien ba nyngkong eh ba kim ki riewlum kin ia kynduh lang shi sha jaka bad kane ka jingiakynduh lang ka long ban pyni ia ki sap ki phong jong ki riew lum jong kane ka Ri kaba khraw.
Ha kane ka sngi u myntri rangbah u la ong ba ki paidbah riewlum mynta kila pdiang ha ka imlang sah lang kum ka kynhun, wat ha pdeng ki jingeh kiba bun ki ia imlang sah lang da ka jingiakmen. La ong b aka sorkar kala kut jingmut ban pyndon kam ia ki kor ki bor kiba katkum kane ka juk kaba mynta ban tih ia ki marpoh khyndew kum u dewiong bad ban tan ia ka lyer bad kane kan ia da ka jingshah ktah jong ki riewlum.U myntri rangbah duh u la kren ruh ia ka “Rurban Mission” ba kumno ban kyntiew ia ka roi kapar sha ki nongkyndong.
Ia ka jingialang la pyniaid da u myntri ba dei peit ia ki riewlum u Jual Oram, ha ka jingkren ka jong u la ong ba ka sorkar pdeng kan trei na ka bynta ka roi ka par jong ki riewlum ha baroh ki liang. Ka sorkar pdeng ka kwah ban pynkhlian kumno ban kyntiew ia ka pule puthi ia ki riewlum. Ka sorkar ka thrang kumno ban pynioh ia ka iew na ka bynta jong ki tiar ba la shna da ki riewlum.
Ha kane ka jinglehkmen baroh ki paid riewlum kiba la ia poi sha kane ka sngi ki long kumba 1200 ngut ki riewlum kiba la wanrah iala ki jong ki jong ki jingshna tynrai jong kin a baroh kawei ka Ri India.Kiwei ki myntri sorkar pdeng kiba la ia don lang ha kane ka sngi ki long u Anil Madhav Dave, u Jaswantsinh Sumanbhai Bhabhor, u Sudarshan Bhagat, u Kiren Rijiju bad u Vishnu Deo Sai . Ha kane ka sngi la batai ruh ia kiba bun ki ain ha kaba ia dei bad ka jingai jingiada ia ki riewlum.
Ki nongiashim bynta baroh ki long 1600 ki riewlum bad kum ka kynhun kiba la ia poi kilo kot sha ka 8000 na ki jylla bad ki Union Territory, kum na Arunachal Pradesh, Assam, Manipur, Telangana, Meghalaya, Mizoram, Tripura, Chhattisgarh, Gujarat, Himachal Pradesh, Andhra Pradesh, Jharkhand, Kerala, Madhya Pradesh, Maharashtra, Nagaland, Odisha, Rajasthan, Karnataka, Sikkim, Andaman & Nicobar Islands bad Tamil Nadu.
