Shillong, Risaw 17: Ka HYC- Shella Area Unit ka pynpaw ia ka jingkmen bad sngew sarong halor ka jingshai jied jong ki 7 Ngut ki khun Samla ka Shnong Shella ban mihkhmat ia ka Jylla ha ka lympung ia khun “Glenmark 37th Sub-Junior bad 47th Junior National Aquatic Championship-202” ka ban long Bangalore, Karnataka ha ki tarik 19 haduh 23 mynta u bnai.
Kine ki Samla jong ka Shnong ki long U Pynshngain Ora, Rangkynsai Myrthong, ka Pdiangsuklang Syngwan, Mary June Syngwan, Ilarisuk Youroi, U Banraplang Marbaniang bad Shankupar Ora.
Ka Seng ka duwai ba U Blei Nongbuh Nongthaw un don ryngkat bad ki naduh ba ki mih na la ki Ing ki sem tad haduh ba kin da wanphai suk bad ngi kitbok ruh ia kine ki khun Samla ka Shnong ba kin lah ban ialeh bha ha kane ka Lympung bad ba kin ioh khur jingjop khnang ba kin wanrah ka nam ka burom ia la ka Ing ka sem, ka Shnong ka thaw bad ka Jylla hi baroh kawei.
Ka Seng ka phah ruh ia ka khubor kitbok kitrwiang ia baroh ki Nongiashim bynta ki ban mihkhmat ia ka Jylla sha kane ka Lympung. Ha kawei pat ka liang ka Seng ka pynpaw ia ka jingsngew bynniaw ba watla ka Shnong Shella na ka por sha ka por ka pynmih ia ki Khun Samla kiba donsap ha ka jingialehlai Jngi Um.
Hynrei namar ba ngim don ia ka lad ban ioh ia ka jinghikai pyntbit ne ka jaka ban kilan met kum ka Swimming Pool ha Shnong, ka pynlong ia ki Samla watla ki don ia ka sap hynrei kim lah ban ia aireng bad kiwei pat ki Samla kiba ioh ia ka lad bad jinghikai kiba pura.
Kumta ka Seng ka kyntu ia ki bor ba dei peit ba kin thawlad lynti ba kin wanrah ia ka Shlem ai jinghikai hapoh Shnong ha ryngkat ki jaka ai jinghikai bad ki Nonghikai kiba biang khnang ba yn lah ban nang pyntbit bad pynkiew shuh shuh ia kane ka rukom lehkai hapoh ka dong ka thain Shella hi baroh kawei. La ong u bah Seiborlang Diengdoh general secretary ka HYC, Shella Unit.
