Shillong, Naiwieng 8: Da ka jingthmu ban pynshlur bad ai mynsiem iaki samla pule kiba pass bha ha ki jingpule bapher bapher , ka KSU Marshillong Unit mynhaka 7 tarik jong u bnai Naiwieng ka la pynkupburom iaki 5 ngut ki samla pule napoh jongka thain.
Ia kane ka jingialang pynkupburom la pynlong ha Lyngdoh Wanniang Secondary School , Marshillong ha kaba la iadon ryngkat lang da u bah Synsharlang Lyngkhoi kum u Kongsan , u bah Gilbert Thongni uba dei u Myntri shnong jongka shnong Marshillong bad la pynshit pynshngain shuh shuh ha kane ka sngi da ka jingwan iashim bynta lang da ki nongialam jongka KSU naduh u samla Redyonstone Nongrum Asst. General Secretary KSU Sengkmie , u samla Raymond Kharjana Education Secretary KSU Sengkmie bad kiwei kiwei ki nongialam ka seng na SWKH District.
Haba kren ha kane ka jingialang naka liang u bah Gilbert Thongni uba dei u myntri shnong jongka shnong Marshillong u la ai khublei iaka KSU kaba la shim ia kane ka bynta ba khraw bad u la ai mynsiem ruh iaka seng ba kan nang kiew naka por sha ka por.
Naka liang u samla Raymond Kharjana Education Secretary KSU Sengkmie u la ong ba ki samla pule ki dei ban nangtrei shitom shuh shuh khnang ba kin nanglah ban kynjoh shaka nam khlem da klet ne niew bein noh pat iaka jinglong kyrpang jong ka Jaitbynriew lashai la shisngi.
